पोखरा । नेपाली कांग्रेसका पूर्वमन्त्री कुमार खड्का, एमाले गण्डकीका नेता पुष्प अधिकारी र कांग्रेस महाधिवेशन प्रतिनिधि मिलन थापा राष्ट्रिय स्वतन्त्र पार्टी प्रवेश गरेका छन् ।

उनीहरूलाई रास्वपा उपसभापति स्वर्णिम वाग्ले, महामन्त्री कविन्द्र बुर्लाकोटी, प्रवक्ता मनिष झा, नेता समीक्षा बास्कोटा लगायतले पार्टीमा स्वागत गरे ।

खड्का अखण्ड नेपाल पार्टीबाट संघीय महिला बालबालिका मन्त्री र काँग्रेसमा समाहित भएपछि गण्डकीका समानुपातिक सांसद बन्दै भौतिक पूर्वाधार तथा यातायात मन्त्रीसमेत भइसकेका हुन् । उनलाई कांग्रेसले अन्तरघात गरेको आरोपमा निष्कासन गरेपछि आज रास्वपा प्रवेश गरेका हुन् । खड्का केहि समयअघि नेपाली कांग्रेसको अनुशासन कारबाहीमा परेका थिए । २०७९ को निर्वाचनमा हालका प्रदेश मन्त्री विन्दुकुमार थापासँग हराउन लागेको भन्दै खड्का कारबाहीमा परेका थिए ।

रास्वपा छिरेका कुमार खड्का पद र अवसरका लागि बारम्बार पार्टी फेरिरहने चतुर नेताका रूपमा परिचित छन् । क्षेत्रीहरूको आन्दोलनको जगमा गठन भएको अखण्ड नेपाल पार्टीबाट १ जनामात्र समानुपातिक सांसद बनेर संघीय संसद छिरेका खड्का २०७४ को चुनावअघि कांग्रेसमा विलय हुँदै गण्डकीमा समानुपातिक सांसद हुँदै मन्त्री बनेका थिए ।

खड्का कृष्णचन्द्र नेपाली पोखरेल नेतृत्वको सरकारमा शक्तिशाली भौतिक पूर्वाधार मन्त्री बनेका थिए । मन्त्री हुँदा विभिन्न योजना र बजेट विनियोजनमा विवादमा परिरहने खड्का पछिल्लो समय कांग्रेसमा अवसर नपाएपछि नयाँ शक्तिको ओत लाग्न रास्वपा पुगेका हुन् ।

रास्वपा प्रवेश गरेका अधिकारी रुपाकोट रिसोर्टका सञ्चालक पनि हुन् । एमालेबाट अघिल्लो पटक पोखरा महानगरमा मेयरको आकांक्षी थिए । अधिकारी अघिल्लो पटक एमालेको गण्डकी प्रदेश कमिटी सदस्यसमेत थिए । अधिकारी एमाले उपाध्यक्ष पृथ्वीसुब्बा गुरुङ पक्षधर मानिन्थे ।

रास्वपा प्रवेश गर्न लागेकी कांग्रेस महाधिवेशन प्रतिनिधि थापा अहिले गण्डकीका सामाजिक विकास मन्त्री रहेका विन्दुकुमारकै भाइबुहारी हुन् ।

विन्दुकुमारका भाइ अटोमोबाइल्स एसोसिएसन अफ नेपाल (नाडा)का पूर्वअध्यक्ष ध्रुव थापाकी पत्नी कांग्रेसकै पारिवारिक विरासत त्यागेर रास्वपा प्रवेश गरेकी छन् । जेनजी आन्दोलनको दोस्रो दिन भदौ २४ गते मन्त्री थापाको निवास, व्यापारिक प्रतिष्ठान, बगैंचा रिसोर्टसहित धुर्वको घर तथा व्यावसायिक प्रतिष्ठानमा पनि तोडफोड र आगजनी भएको थियो ।

मन्त्री परिवार भएकै कारण आफूहरूको व्यवसाय तथा घरमा आगलागी भएको उनीहरूको भनाइ थियो भने उनीहरूकै घरमा काम गर्ने एक जना महिलाको आगलागीमा जलेर मृत्युसमेत भएको थियो । बिन्दु थापाको भवनमा अर्की युवतीको ज्यान गएको थियो ।