स्याङ्जाको हरिनास गाउँपालिकाको नयाँ प्रशासकीय भवन निर्माणको काम सुरु भएको छ । जग्गा विवादका कारण केही महिना रोकिएको निर्माण कार्य समस्या समाधान भएसँगै पुनः अघि बढाइएको हो ।

२०८२ वैशाख ४ गते भएको सम्झौताअनुसार उक्त भवन निर्माणको जिम्मा प्रजिल कन्स्ट्रक्सनले लिएको छ । तीन करोड ७३ लाख ४५ हजार ८ सय ६७ रुपैयाँ २१ पैसाको लागतमा निर्माण हुने यो भवन गाउँपालिकाले उपलब्ध गराएको ड्रइङअनुसार करिब १८ महिनाभित्र सम्पन्न गर्ने सम्झौतामा उल्लेख छ । बीचमा उत्पन्न भएको जग्गा विवादका कारण करिब पाँच महिना काम रोकिए पनि अब कुनै अवरोध नआए तोकिएकै समयभित्र काम सक्ने लक्ष्य निर्माण कम्पनीले लिएको जनाएको छ ।

लामो समयदेखि अलपत्र परेको प्रशासकीय भवनको निर्माण सुरु भएपछि स्थानीय बासिन्दा खुसी देखिएका छन् । अन्य पालिकामा सुविधा सम्पन्न प्रशासकीय भवन देख्दै आएका हरिनासका नागरिकले आफ्नै पालिकामा पनि व्यवस्थित भवनको माग गर्दै आएका थिए ।

यसअघि गाउँपालिकाका अध्यक्ष खिम नारायण मानन्धरले प्रशासकीय भवनभन्दा स्वास्थ्य सेवा प्राथमिक आवश्यकतामा पर्ने भन्दै पुरानै भवनबाट सेवा दिने नीति लिँदै आएका थिए । सोही कारण प्रशासकीय भवनका लागि आएको बजेट संघीय सरकारलाई फिर्ता गरेर मग्याम चिसापानीमा सुविधासम्पन्न अस्पताल निर्माण थालिएको थियो । अस्पतालको करिब २५ प्रतिशत काम सम्पन्न भएपछि मात्र प्रशासकीय भवनको ठेक्का प्रक्रिया अघि बढाइएको हो ।

हाल साँघुरो र अव्यवस्थित भवनबाट सेवा दिँदै आएको गाउँपालिकाले नयाँ भवन निर्माणपछि सेवा प्रवाह सहज, सरल र व्यवस्थित हुने विश्वास लिएको छ । साथै महत्त्वपूर्ण कागजात सुरक्षित राख्न पनि सहयोग पुग्ने अपेक्षा गरिएको छ ।

हरिनास गाउँपालिकालाई समृद्ध र सेवामैत्री बनाउने अभियानअन्तर्गत नयाँ प्रशासकीय भवन निर्माण अघि बढाइएको अध्यक्ष मानन्धरले बताए । बाँकी कार्यकालमा सकेसम्म विकास निर्माणका कामलाई प्राथमिकतामा राखेर अघि बढ्ने उनको भनाइ छ ।