बंगलादेशमा विद्यार्थी विद्रोहको जगमा गठन भएको नेशनल सिटिजन पार्टी (एनसीपी) ले निर्वाचनमा लज्जास्पद परिणाम हासिल गरेको छ ।

सबैभन्दा चासोका साथ हेरिएको नेशनल सिटिजन पार्टी (एनसीपी)को भने लज्जास्पद परिणाम आएको हो । एनसीपीले जम्मा ६ सिट ल्याएको छ ।

स्मरण रहोस्, २०२४ मा भएको जेनजी विद्रोहको कारण शेख हसिनाको बहुमत सरकार ढलेको थियो । हसिना देश छाड्न बाध्य भएकी थिइन् ।

हसिनाले देश छाडेपछि बंगलादेशमा नोबेल शान्ति पुरस्कार विजेता मोहम्मद युनुसको नेतृत्वमा अन्तरिम सरकार गठन भएको थियो । सोही सरकारले बिहीबार निर्वाचन गराएको हो ।

यो निर्वाचनमा हसिनाको पार्टी सहभागी छैन । हसिनाको पार्टीमाथि प्रतिबन्ध लगाइएको छ । तर, त्यही आन्दोलनको जगमा गठन भएको जेनजीहरूको पार्टी एनसीपीले भने लज्जास्पद परिणाम ल्याएको छ ।

नतिजा अस्वीकार, छानबिनको माग

चुनावमा लज्जास्पद हारलाई एनसीपीले भने अस्वीकार गरेको छ । चुनावी परिणाम आउँदै गर्दा विशेष पत्रकार सम्मेलन गरेर एनसीपीले परिणाम मान्य नभएको बताएको छ । परिणामलाई ‘षडयन्त्रपूर्ण ढंगले धाँधली’ गरेको बताएको छ ।

एनसीपीका प्रवक्ता आसिफ महमूद सजीबले भनेका छन्– नतिजा अत्यन्त बाल सुलभ तरिकाले हेरफेर भएका छन्, यी धाँधली भएका परिणामलाई हामीले स्वीकार गर्दैनौँ, निष्पक्ष छानबिन हुनुपर्ने माग हाम्रो छ ।

उनले ढाकाभित्रै निर्वाचन क्षेत्रहरूमा धाँधली भएको आरोप लगाएका छन् ।

यद्यपि, चुनावी परिणामलाई अन्तर्राष्ट्रिय समुदायले भने स्वागत गरेका छन् । चुनाव निष्पक्ष भएको अन्तर्राष्ट्रिय पर्यवेक्षकहरूको दाबी छ ।

परिणाम आइरहँदा अमेरिका र भारतले स्वागत गर्दै बीएनपीलाई बधाई दिएका छन् ।

बंगलादेशमा भ्रष्टाचार र सुशासनको मागसहित जुलाई २०२४ मा विद्यार्थी आन्दोलन सुरू भएको थियो । सरकारी जागिरका लागि व्यवस्था गरिएको आरक्षणविरूद्ध उनीहरूले सुरूवाती दिनमा प्रदर्शन गरेका थिए ।

विद्यार्थी आन्दोलन विस्तारै भ्रष्टाचार र सरकारी दमनविरूद्ध विद्रोहमा परिणत भयो । तत्कालीन शेख हसिना नेतृत्वको सरकार आन्दोलनकारी विरूद्ध आक्रामक बन्दै सेनालाई सडकमा उतारेको थियो । सो आन्दोलनको क्रममा झण्डै १४ सय मानिसहरू मारिएका संयुक्त राष्ट्रसंघले जनाएको छ । मारिनेमा अधिकांश क्याम्पसमा अध्ययनरत विद्यार्थी र युवा थिए ।

आन्दोलन चर्किदै गएपछि हसिना देश छाडेर भारत भागेकी थिइन् । उनी देश छाडेर भागेपछि बंगलादेशमा नोबेल शान्ति पुरस्कार विजेता मोहम्मद युनुसको नेतृत्वमा अन्तरिम सरकार गठन भएको थियो । सोही सरकारले विहीबार निर्वाचन गराएको हो । शेख हसिनाको पार्टीमाथि प्रतिबन्ध लागेकाले निर्वाचनमा सहभागी हुन पाएको थिएन ।

पूर्वप्रधानमन्त्री बेगम खालिदा जियाका छोराले नेतृत्व गरेको बीएनपी पार्टीले भने सबैभन्दा धेरै सिट जितेर बहुमत हासिल गरेको अन्तर्राष्ट्रिय सञ्चार माध्यमहरुले जनाएका छन् । सो पार्टीका अध्यक्ष तारिक रहमान प्रधानमन्त्री बन्ने छन् । बीएनपी करिब दुई दशकसम्म सत्ता बाहिर थियो ।

हाल भारतमा निर्वासन जीवन बिताइरहेकी बंगलादेशकी पूर्व प्रधानमन्त्री शेख हसिनाले यस चुनावलाई पूर्णरूपमा फर्जी र असंवैधानिक भनेकी छन् ।

अन्तरिम सरकार प्रमुख मोहम्मद युनुसले गैरकानुनी र असंवैधानिक ढंगले सत्ता कब्जा गरेर त्यही आधारमा चुनाव गराएको उनको आरोप छ ।