झापा : नेकपा एमालेका अध्यक्ष केपी शर्मा ओलीले आफू सरकारमा आउने वित्तिकै देश कुद्ने दावी गरेका छन् ।

झापाको दकममा सोमबार कोशीको नेशनल भोलिन्टियर्स फोर्स घोषणा कार्यक्रमलाई सम्बोधन गर्दै अध्यक्ष ओलीले आफूले सरकार छाडेपछि देश जहाँको त्यहि बस्ने र केहि नहुने बताउँदै भने, ‘अनि म फेरि सरकारको नेतृत्वमा फर्कन्छु, काम अघि बढ्छ । मलाई सरकारबाट हटाएपछि ड्राइभर बिनाको गाडी जस्तो हुन्छ देश ।’

कतिपयले आफूलाई किन उम्मेदवार बन्नु भएको ? भनेर प्रश्न गरेको बताउँदै अधुरा काम पूरा गर्नका लागि भएको बताएका छन् । ‘कतिपयले मलाई सोध्ने गर्छन्, तपाईंले धेरै काम गर्नु भएको छ, यतिधेरै विकास गर्नु भएको छ, अब फेरि किन उम्मेदवार हुन प¥यो र ? काम धेरै भएको छ, तर अझै धेरै गर्नुपर्ने छ । अधुरा काम गर्नुपर्ने छ । त्यसकारण हो,’ ओलीले जिकिर गरे ।

आफूले सरकारको नेतृत्व गर्ना साथ व्यापक काम हुने र त्यो देशेपछि विरोधीहरू थर्कमान हुने ओलीले बताए । ‘मैले काम गर्न थाल्छु, काम व्यापक भएको देखेपछि विरोधीहरू थर्कमान हुन्छन् । भूमिगत गिरोह पनि थर्कमान हुन्छ,’ अध्यक्ष ओलीले भने, ‘त्यो काम रोक्नका लागि मलाई सरकारबाट हटाउने रे । काम रोकिन्छ, काम बन्द हुन्छ, फेरि म आउन पर्छ ।’

अध्यक्ष ओलीले राष्ट्रिय स्वतन्त्र पार्टी (रास्वपा) का वरिष्ठ बालेन्द्र शाहलाई लक्षित गर्दै बच्चाले जस्तै प्रधानमन्त्री बन्छु भनेको कटाक्ष गरेका छन् । अध्यक्ष ओलीले प्रधानमन्त्री बन्न भिजन चाहिने बताएका छन् । प्रधानमन्त्रीका उम्मेदवारबारे चर्चा गर्दै ओलीले भने, ‘बच्चालाई के हुने भनेर सोध्यो भने प्रधानमन्त्री पनि भन्छ, राष्ट्रपति पनि भन्छ । केही मान्छेलाई यस्तै लाग्यो प्रधानमन्त्री बन्ने भनेका छन् ।’

आउँदो प्रतिनिधि सभाको चुनावमा एमालेले ओलीलाई प्रधानमन्त्रीको उम्मेदवार घोषणा गरेको छ । त्यस्तै रास्वपाले शाहलाई र नेपाली कांग्रेसले गगन थापालाई प्रधानमन्त्रीको उम्मेदवार घोषणा गरेको छ । त्यसबारे चर्चा गर्दै ओलीले प्रधानमन्त्री बन्न बच्चाले भने जस्तो नहुने टिप्पणी गरेका हुन् । ‘हामी प्रधानमन्त्री हुन भिजनसहित आएका छौँ,’ ओलीले भने ।

कसैले बुथ कब्जाको कल्पना नगरे हुन्छ

ओलीले अब कसैले चुनावमा बुथ कब्जा गर्ने कल्पना नगरे हुने बताए । उनले नेकपा एमालेले कसैलाई बुथ कब्जा गर्न नदिने चेतावनी दिए ।

‘कसैले बुथ कब्जा गर्छु भन्छ भने कल्पना नगरेर हुन्छ । बुथ कब्जा गर्ने छुट दिइने छैन,’ ओलीले भने, ‘कसैले बुथ कब्जा गर्न पाउने पनि छैन ।’

त्यसका लागि भोलिन्टियर्स फोर्स गठन गरिएको उनको भनाइ थियो । उनले हरेक बुथमा भोलिन्टियर्स राख्ने बताएका छन् । उनले देशभरका हरेक बुथमा कम्तिमा ३० जना भोलेन्टियर्स राख्न समेत निर्देशन दिए । प्रहरी र सरकारलाई शान्ति सुव्यवस्था कायम गर्न फोर्सले सहयोग गर्ने उनको भनाइ थियो । उनले टोलटोलमा भोलेन्टियर्स फोर्स गठन गर्न निर्देशन दिंदै यसका लागि पार्टीले आवश्यक सहयोग गर्ने बताए । उनले फोर्सलाई स्थानीय पार्टीले पनि हस्तक्षेप गर्न नहुने बताए ।

एमालेले आफ्नो नेतृत्वमा देशका धेरै विकासका काम गरेको पूर्व प्रधानमन्त्री समेत रहेका अध्यक्ष ओलीले दावी गरे । उनले देशको जुनसुकै कुनामा गए पनि एमालेले के गर्‍यो भनेर सोधे जवाफ पाइने बताए । अध्यक्ष ओलीले भने, ‘जहाँ उभिएको छ, त्यो ठाउँबाट हेरे एमालेले गरेको विकास सजिलै देखिन्छ ।’ अध्यक्ष ओलीले गर्भमा हुँदादेखि अन्तिम सँस्कारसम्मका लागि एमालेले नागरिकका पक्षमा काम गरेको दावी गरेका छन् । उनले किशोर–किशोरी, ज्येष्ठ नागरिक, महिला र अपाङ्गता भएकाहरुको पक्षमा एमालेले काम गरेको बताएका छन् ।