गण्डकी र लुम्बिनी प्रदेशलाई जोड्ने राम्दी पुल निर्माणको काम अन्तिम चरणमा पुगेको छ । सिद्धार्थ राजमार्गअन्तर्गत स्याङ्जा र पाल्पा जिल्लाको सिमाना राम्दीमा निर्माणाधीन कालीगण्डकी पुलको अधिकांश काम सकिएको हो ।

२०८२ असार मसान्तभित्र निर्माण सम्पन्न गर्ने लक्ष्यसहित सुरु गरिएको पुल केही ढिलाइपछि सम्पन्नतर्फ अघि बढेको हो । २०७९ असार ३० गते २७ करोड ७१ लाख ९ हजार ६ सय रुपैयाँ लागतमा पुल निर्माणका लागि सम्झौता गरिएको थियो । सम्झौताअनुसार गएको असार २९ गतेभित्र काम सक्नुपर्ने भए पनि विभिन्न कारणले समयमै सम्पन्न हुन नसकेको हो ।

निर्माण कम्पनीका साइट इन्जिनियर अविरल शर्माका अनुसार निर्माण सुरु हुन ढिलाइ हुनुका साथै केही प्राविधिक समस्या देखिएकाले तोकिएको ३६ महिनाभित्र काम पूरा गर्न नसकिएको हो ।

२०२८ सालमा सिद्धार्थ राजमार्ग निर्माणसँगै बनेको पुरानो ट्रस पुल जीर्ण बन्दै गएपछि त्यसको पूर्वतर्फ नयाँ पुल निर्माण थालिएको हो । १२० मिटर लम्बाइ र ११ मिटर चौडाइको यो नयाँ पुल ‘आर्च थ्रु’ डिजाइनमा निर्माण भइरहेको छ ।

हालसम्म पुलको करिब ९० प्रतिशत काम सकिएको इन्जिनियर शर्माले बताए । पुलको माथिल्लो भागमा स्ल्याब राख्ने काम पूरा भइसकेको छ भने पैदलयात्रीका लागि बनाइने संरचनाको काम पनि अन्तिम चरणमा पुगेको जनाइएको छ ।

नयाँ पुल सञ्चालनमा आएपछि कालीगण्डकी नदी सुरक्षित रूपमा वारपार गर्न सहज हुने स्थानीयवासीको अपेक्षा छ । पुरानो पुलमा १५ टनभन्दा बढी भार बोकेका ट्रक सञ्चालनमा रोक लगाइएकाले स्याङ्जा क्षेत्रमा ढुवानी लागत बढ्दा दैनिक उपभोग्य सामग्रीसमेत महँगिएको वालिङ उद्योग वाणिज्य सङ्घका अध्यक्ष चेतनारायण श्रेष्ठले बताए ।