तीन दिनदेखि लगातार परेको वर्षाका कारण कालीगण्डकी नदीमा पानीको बहाव बढेपछि स्याङ्जामा रहेको कालीगण्डकी ‘ए’ जलविद्युत् केन्द्रको विद्युत् उत्पादन बन्द गरिएको छ ।

नदीमा पानीको बहाव उच्च भएपछि बेल्टारीबाट हुँदै आएको १४४ मेगावाट विद्युत् उत्पादन शुक्रबार राति ८:४५ बजेदेखि रोकिएको हो । मिर्मीस्थित बाँधका तीनवटै ढोका खोलिएको आयोजनाले जनाएको छ ।

असार–साउनमा भन्दा असोजमा कालीगण्डकी नदीमा पानीको बहाव अस्वाभाविक रूपमा बढेपछि बाँधको अवस्था र आसपासका बस्तीमा हुन सक्ने डुबानको जोखिमलाई ध्यानमा राख्दै उत्पादन बन्द गरिएको कालीगण्डकी ‘ए’ जलविद्युत् केन्द्रका प्रमुख आत्मेस पौडेलले बताए ।

उनका अनुसार नदीमा पानीको बहाव घटेपछि आयोजनाबाट पुनः नियमित रूपमा विद्युत् उत्पादन सुरु गरिनेछ ।

लगातारको वर्षासँगै कालीगण्डकी आसपासका बस्ती तथा संरचनामा जोखिम बढेको छ । वर्षाका कारण जनजीवनसमेत प्रभावित भएको छ ।

स्याङ्जा, पर्वत र गुल्मी तीन जिल्लाको संगमस्थल सेतीबेणीमा समेत कालीगण्डकी नदीको पानी बढेपछि केही घर डुबानमा परेका छन् ।