नेपाल खेलकुद पत्रकार मञ्च, कास्कीको आयोजनामा पोखरा सभागृहमा भएको तेस्रो टिभिएस अपाचे पोखरा स्पोर्टस् अवार्ड समारोहमा चर्चित गायक विनोद बानियाँलाई सम्मान गरियो ।

राजधानीमा रहेर यहाँ भन्दा बढी चर्चा बटुल्ने ज्ञात रहँदा रहँदै आफ्नो गाउँठाउँ नछाडि आफूलाई अरु सरह स्थापित गर्न सफल गायक बानियाँले खेलकुदका विभिन्न गीतहरु पनि गाएका छन् । खेल क्षेत्रमा गायनका तर्फबाट योगदान दिएको भन्दै गायक बानियाँलाई मञ्चले सो अवसरमा सम्मान गरेको हो ।

सो अवसरमा गायिका अजुदा थापाको साथमा बानियाँले आफ्ना प्रस्तुति पनि राखे । अवार्ड समारोहमा उपस्थित दर्शकलाई उनको प्रस्तुतिले भरपूर मनोरञ्जन प्रदान गर्यो ।

२०५८ साल तिरै ‘माया देखायौ’ भन्ने गीतमा आवाज दिएर गायन यात्रा थालेका विनोदले ‘मान्छे’, ‘डाउट’, ‘प्रोफाइल’ एल्बम ल्याइसकेका छन् ।

जीवनमा धेरै उतारचढावहरु खेप्दै भएपनि यो क्षेत्रमा लागिरहेका छन् । गायन यात्रा सुरु गरि चर्चा हुन थालेसँगे उनलाई धेरैले काठमाडौं गएर प्रतिभालाई उजागर गर्न र आफ्नो उज्ज्वल भविष्य खोज्न सल्लाह दिन्थे । उनले सबैको सल्लाह सुने तर, निर्णय आफ्नो गरे र पोखरामा संघर्ष गरे । गायक बानियाँले अहिलेसम्म थुप्रै गीतमा आवाज भरेका छन् ।

बानियाले खेलकुदका साथै राष्ट्रिय गीत पनि गाएका छन् । लामो समय व्यावसायिक रुपमा ओपन हाउसमा रहेर गजल तथा सुगम संगीतमा आवाज दिएका बानियाँले आफु समेत सञ्चालकका रुपमा मेलोडी क्याफे खोलेका छन् । जहाँ उनले अहिले पनि निरन्तर गीत गाउँछन् ।

सम्बन्धित समाचारः

गायक बिनोद बानियाको थपिएको ‘प्रोफाइल’