कास्की क्षेत्र नम्बर १ प्रदेश सभा १ का नेकपा एमालेका उम्मेदवार खगराज अधिकारीले गण्डकी प्रदेशमा एमालेको एकल बहुमतकाे सरकार बन्ने दाबी गरेका छन् ।

पोखरा महानगर ३० मा आयोजित शुभकामना आदनप्रदान तथा भेटघाट कार्यक्रममा बोल्दै नेता अधिकारीले प्रत्यक्षमा २२ सिट र समानुपातिकमा १० सिट जितेर सरकार बनाउने दाबी गरेका हुन् ।

उनले जनताको पक्षमा निरन्तर बोल्दै र काम गर्दै आएकै कारण एमालेलाई जनताले जिताउने विश्वास व्यक्त गरे ।

पछिल्लो समय जनताका दैनिक गुजारा गर्न आवश्यक खाद्य सामाग्रीमा बढेको मुल्यवृद्धिलाई बेवास्ता गर्दै राजनीति भागबन्डा र फण्डामा केन्द्रित बन्नुले जनताका समस्याप्रति गठबन्धन कति संवेदनशील छ भन्ने प्रष्ट भईसकेको उनको भनाई थियो ।

प्रतिनिधिसभाबाट प्रदेश सभामा पार्टीको निर्णय र फैसला अनुसार आफू प्रदेशसभामा उम्मेदवार बनेको भन्दै उनले आफू प्रदेशमा नयाँ अनुहार भएको दाबी गरे ।

‘प्रतिनिधिसभामा होइन प्रदेशसभामा म उम्मेदवार बनेको छु, र म प्रदेशका लागि नयाँ अनुहार हुँ’,उनले भने । जनतासंग अझै नजिक रहेर काम गर्ने अवसर मिलेको भन्दै अपूरा विकासका काममा जनताकै सल्लाह र समन्वयमा अगाडि बढ्ने उनले बताए ।