गण्डकी प्रदेश सभामा निर्विराेध चयन भएका स्वतन्त्र सांसद राजिव गुरुङ (दीपक मनाङे) नेकपा एकीकृत समाजवादीमा प्रवेश गरेका छन् । सोमवार दिउँसो पार्टी अध्यक्ष माधवकुमार नेपालले उनलाई पार्टी प्रवेश गराएका हुन् ।

मंसिर ४ गते सम्पन्न निर्वाचनमा मनाङे मनाङबाट प्रदेश सभामा निर्विरोध चुनिएका थिए । मनाङेले नेकपा एसको नीति र सिद्धान्त आफ्नो नीति र सिद्धान्तसँग मेल खाएकाले पार्टी प्रवेश गरेको उल्लेख गरेका छन् ।

मनाङले पार्टी प्रवेश गरेसँगै गण्डकी प्रदेश सभामा नेकपा एसको पनि एक सिट भएको छ । उक्त पार्टीले प्रदेश सभातर्फ एउटा पनि सिट जित्न सकेको थिएन । अघिल्लो कार्यकालमा पनि स्वतन्त्र सांसद रहेका मनाङे प्रदेशका खेलकुद मन्त्री पनि हुन् ।

गठबन्धनकै सरकार बन्ने निश्चित भएकाले एसबाट मनाङे मन्त्री बन्ने चर्चा छ । नेकपा टुक्रने समयमा पृथ्वीसुब्बा गुरूङ नेतृत्वकाे क्याबिनेटमा खेलकुद मन्त्री भएका मनाङे एमालेकाे साथ छाड्दै काँग्रेस नेतृत्वकाे सरकारमा पनि मन्त्रीमा निरन्तर रहे । अब बन्ने नयाँ सरकारमा पनि मन्त्री बन्ने निश्चित गरेर नेकपा एस प्रवेश गरेकाे टिप्पणी भइरहेकाे छ ।