पाेखरा । इलाका प्रहरी कार्यालय बुटवलका प्रहरी नायब उपरीक्षक (डीएसपी) ठगबहादुर केसी जिल्ला प्रहरी कार्यालय कास्कीमा सरूवा भएका थिए । उनी आज रमाना लिई पाेखरा आउने तयारीमा थिए । डीएसपी सुन्दर तिवारीकाे स्थानमा केसी कास्की सरूवा भएका हुन् ।

तर, केसी आफै प्रहरी नियन्त्रणमा छन् । प्रहरी प्रधान कार्यालयको निर्देशनमा काठमाडौंबाट आएको केन्द्रीय अनुसन्धान ब्यूरो (सीआईबी) को टोलीले आइतबार साँझ केसीलाई निवासबाटै नियन्त्रणमा लिएको हो ।

सुन कारोबारसम्बन्धी मुद्दामा रकम असुली गरेको विषयमा अनुसन्धान गर्न भन्दै पुगेको प्रहरी टोलीले केसीको निवासमा खानतलासी गर्दा ३५ तोला सुन र २५ लाख रुपैयाँ नगदसमेत बरामद गरेको प्रहरीको भनाइ छ ।

तर केसीले भने आफूलाई बदनाम गराउन खोजिएको दाबी गरेकाे बताइन्छ । केसीमाथि गत मंसिरमा बुटवलका एक व्यापारीले ल्याएको सुन नियन्त्रणमा लिएर आफैँले राखेको र व्यापारीसँग २५ लाख रुपैयाँ मागेको आरोप लागेको छ ।

केसी वडाध्यक्षलाई लात्ताले हानेर पोखरीमा फ्याँकिदिएका बेला चर्चामा थिए । गत साउन १ गते तिलोत्तमा नगरपालिकाका जनप्रतिनिधि र प्रमुख प्रशासकीय अधिकृतका बीचमा विवाद बढ्दै जाँदा उनले वडाध्यक्षलाई लात्ताले हानेर पोखरीमा चाेबिदिएका थिए ।