पोखरा। रातकाे समयमा चेकिङमा रहेका प्रहरीकाे हात भाँचिदिएकाे आराेपमा पक्राउ परेका युवा व्यवसायी ५ दिन हिरासत बसेर रिहा भएका छन् ।

२५ वर्षीय अटो व्यवसायी सौरभ थापा जरिवाना रकम तिरेर रिहा भएका हुन् । अभद्र व्यवहारकाे मुद्धा खेपेका थापा २ हजार ८ सय जरिवाना तिरी सिडिओकाे आदेशमा छुटेकाे कास्की प्रहरीले जनाएकाे छ ।

प्रहरीका अनुसार थापाले चलाएको गाडीले माघ १२ गते बिहान ३ बजे पोखरा-१० रामबजार, पेन्सन क्याम्प अगाडि चेकिङमा बसेका प्रहरीलाई ठक्कर दिएको थियो । मादकपदार्थ सेवन गरेका थापाले नियोजित रुपमै गाडीको ढोकाले प्रहरी हवल्दारलाई हानेको प्रहरीले बताएको छ । ढाेकाकाे ठक्करबाट प्रहरी हवल्दार चित्रबहादुर वलीकाे हात ‘क्र्याक’ भएकाे छ । उनलाई बिहीबार नै पक्राउ गरी पाँच दिन म्याद थप गरी अनुसन्धान गरेकाे कास्की प्रहरीका निमित्त सूचना अधिकारी इन्स्पेक्टर सुवास तिमिल्सिनाले बताए ।

प्रहरीका अनुसार उक्त दिन थापाले चलाएकाे गाडीको स्पिड बढी देखेपछि प्रहरीले रोक्न खोज्दा थापा अघि पुगे । त्यसपछि फर्केर प्रहरीकै आडमा रोकेर ढोका खोल्दा हात भाँचिएको थियाे ।  सौरभ अटोमोबाइल्स एसोसिएसन अफ नेपाल (नाडा) केन्द्रीय अध्यक्ष ध्रुवबहादुर थापाका छोरा हुन् ।

सौरभले आफ्नो जन्मदिन पुस तेस्राे साता पनि लेकसाइडको क्याटवाक नाइट क्लबका संचालकको पार्किङमा भएको गाडीलाई ठक्कर दिएका थिए । त्यसपछि त्यहाँ सम्झाइबुझाइ गरेर पठाउँदा झनै उग्र रूपमा प्रस्तुत हुँदै अपशब्द बाेल्दै दोस्रोपटक पार्किङमा भएको गाडीलाई ठक्कर दिएपछि बाउन्सरले बल प्रयाेग नै गर्नुपरेकाे प्रत्यक्षदर्शीले जानकारी दिएका छन् ।

प्रहरीले बोलाएपछि बिहान उनी आफैँ वडा प्रहरी कार्यालय बैदाम पुगेका थिए । त्यहाँ दुई-तीन घण्टा राखेर उनलाई प्रहरीले छाडेको थियो ।