पोखरा । कास्कीमा मोटरसाइकल दुर्घटना हुँदा दुई युवकको मृत्यु भएको छ ।

पोखरा महानगरपालिका ३२ बाट रुपा तालतर्फ जाँदै गरेको प्रदेश नम्बर ३–०२–००९ प ५२०५ नम्बरको मोटरसाइकल रुपा गाउँपालिका ६ निगालझाँप्रामा शनिबार सडकबाट तल खस्दा दुई जनाको मृत्यु भएको जिल्ला प्रहरी कार्यालय कास्कीले जनाएको छ ।

सडकबाट झण्डै ९० मिटर तल खसेर भएको दुर्घटनामा मोटरसाइकल चालक लमजुङ दुधपोखरी – ६ का २९ वर्षीय कृष्ण गुरुङ र पछाडि बसेका २४ वर्षीय अशोक गुरुङको मृत्यु भएको प्रहरीले जनाएको छ । मोटरसाइकल शनिबार अपराह्न पौने ४ बजेतिर दुर्घटना भएको थियो ।

दुर्घटनालगत्तै घाइतेलाई इलाका प्रहरी कार्यालय शिशुवाबाट गएको प्रहरी टोलीले उद्धार गरी उपचारका लागि पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालमा पुर्‍याइएको थियो।

चिकित्सकले जाँचका क्रममा दुवै जनालाई मृत घोषणा गरेका थिए। मोटरसाइकल घुम्तीमा आफै अनियन्त्रित भइ सडकमुनि खसेको प्रहरीले जनाएको छ । प्रहरीले दुर्घटनाको कारणबारेमा अनुसन्धान भइरहेको जनाएको छ।

अशोक स्थानीय लालीगुराँस युवा क्लबका अध्यक्षसमेत थिए ।