पोखरा । गण्डकी प्रदेशमा बाहुल्यता रहेका गुरुङसहित मगर र थारु भाषालाई सरकारी कामकाजको भाषा बनाउन आदिवासी जनजाति संघर्ष समिति, गण्डकीले माग गरेको छ ।

आदिवासी जनजाति संघर्ष समिति गण्डकीले मंगलबार पोखरामा पत्रकार सम्मेलन गरेर गुरुङ, मगर र थारु भाषालाई कामकाजको भाषा घोषणा गर्न सरकारसँग माग गरेको हो । गणेश ठाकुरको संयोजकत्वमा गठित भाषा आयोगले गण्डकी प्रदेशमा गुरुङ र मगर तथा देशको दक्षिणी भेगमा थारु भाषालाई सरकारी कामकाजको भाषा बनाउन सिफारिस गरेकाले सोहि अनुसार आवश्यक ऐन, कानून बनाई कामकाजको भाषा घोषणा गर्न समितिको माग छ ।

समितिले नेपालको संविधानको धारा ३१ को उपधारा ५ ले प्रत्येक नेपालीलाई आफ्नो मातृभाषामा शिक्षा पाउने हकको ज्ञारेन्टी गरेकाले सो अनुसार मातृभाषामा पठनपाठनको व्यवस्था गर्नपनि माग गरेको छ । त्यसैगरी प्रदेश स्तरमा भाषा आयोगको शाखा स्थापना गर्न समितिको माग छ । उसले थातथलो, गाउँबस्तीको नाम पुनः मातृभाषामा नामाङ्कृत गर्नपनि समितिले माग गरेको छ ।

समितिले मातृभाषा, साहित्य, कला, संस्कृति संरक्षण, सम्बद्र्धन, खोज अनुसन्धान र विकासका लागि पालिका स्तरमा प्रज्ञाप्रतिष्ठान गठन गर्नपनि माग गरेको छ । समितिले संविधानको धारा ५५ को ५ मा सामाजिक, सांस्कृतिक संरक्षण वा आर्थिक विकासका लागि विशेष, संरक्षित वा स्वायत्त क्षेत्र कायम गर्न सकिने व्यवस्था भएको भन्दै सोअनुसार तत्काल विशेष संरक्षित वा स्वायत्त क्षेत्र निर्धारण गर्नपनि माग गरेको छ ।

समितिले सामाजिक सद्भाव भड्काउने अभिव्यक्ति दिएको भन्दै शितल पाण्डे भनिने भगवती पाण्डेलाई कारवाही गर्न मागपनि गरेको छ ।

समितिले पोखराको पृथ्वीचोकमा रहेको प्रथम सहिद लखन थापाको शालिक हटाउने वा थापामाथि अपमानित हुने खालको गतिविधि भए प्रतिकार गर्ने चेतावनी दिएको छ । सो चोकमा थापाको शालिक हटाएर पृथ्वीनारायण शाहको शालिक राख्ने प्रयास विभिन्न समूहले गर्न थालेपछि आदिवासी जनजाति संघर्ष समितिले यस्तो चेतावनी दिएको हो । उसो त पोखरा महानगरपालिकाले पृथ्वीचोकको शालिक पोखरा–१८ स्थित विभूती पार्कमा स्थानान्तरण गर्ने तयारीसमेत गरिरहेको छ । यसैलाई मध्यनजर गर्दै संघर्ष समितिका सहसंयोजक हुमबहादुर तमुले पुरानो शालिक यथावत राखेर बाँकी शालिकलाई मात्रै विभूतीपार्कमा राख्नुपर्ने बताए । उनले भने,‘प्रतिगमनतर्फ धकेल्न खोज्नेले चलखेल गरेको छ कि भन्ने हामीलाई शंका छ । परिवर्तनसँग जोडिएको, आन्दोलन र अधिकारसँग जोडिएको, ईतिहाससँग जोडिएको विषयमा केटाकेटी खेलेझैं ख्यालख्याल गर्न हुँदैन । थापाको शालिक साविकमै राखेर अन्यलाई विभुती पार्कमा राखेर निकास खोज्नुपर्छ ।’

संघर्ष समितिका संयोजक धर्मबहादुर तमुले माग पूरा नभए आन्दोलन चर्काउने चेतावनी दिए । हामी शान्तिपूर्ण रुपमा माग राखिरहेका छौं,उनले भने,‘संविधानले नै दिएका कुरा सरकारले पूरा गर्नुपर्छ । अन्यथा माग पूरा गर्न हामी आन्दोलनमा जानुको विकल्प छैन ।’