दुई महिनाअघि पोखराको सभागृहचोकदेखि विपिचोकसम्म न्यूरोडको सडकमा निर्माण गरिएको डिभाइडरमा इक्सोरा प्रजातिको ८ सय बिरुवा रोपियो ।

पोखरा महानगरपालिकाका प्रमुख धनराज आचार्य र उपप्रमुख मञ्जुदेवी गुरुङले संयुक्त रूपमा बिरुवा रोपण गरी शुभारम्भ गरेका थिए । सो दिन मेयर आचार्यले भनेका थिए – ‘बिरुवाहरूको संरक्षण स्थानीयहरूले गर्नुपर्छ र महानगरपालिकाले विशेष निगरानी गर्नेछ ।’

तर, स्थानीयबाट संरक्षण भएन । बिरुवाहरु गाइवस्तुले खाने, चोर्ने, उखेलेर फाल्ने कार्य भइरह्याे । भनिएझैँ महानगरबाट पनि विशेष निगरानी भएको देखिएन । मेयर आचार्यले आज सामाजिक सञ्जाल फेसबुकमा राम्रो फूलका बिरुवा उखेल्ने र चोरी गर्ने गरेको पाइएकोले सीसीटिभी क्यामेराबाट व्यक्ति पहिचानको कार्य भइरहेको जनाएका छन् ।

उनले लेखेका छन्ः ‘न्यूरोडको डिभाईडरमा सौन्दर्यको लागि रोपिएका राम्रा जातका फूलका बिरुवा चोरी गर्ने र उखेलेर छाड्ने गरेको पाइएको छ। सीसी क्यामराबाट चोर÷नकारात्मक सोच भएका ब्यक्तिको पहिचान हुँदैछ । यो अत्यन्तै नराम्रो काम हो। बिरुवा तथा सार्वजनिक सम्पत्तिको संरक्षणमा स्थानीय साथीहरुले बिशेष ध्यान दिनुहुन अनुरोध छ।’

घामपानी सहन सक्ने क्षमता भएको, बाह्रै महिना फुल्ने र बुट्यानको रूपमा हुर्कने इक्सोरा प्रजातिको बिरुवा पोखराका लागि उपयुक्त हुने पुष्प विज्ञ बसन्त बानियाँले बताए । उनका अनुसार यसका लागि मल जराभन्दा पनि पातबाट दिनुपर्ने हुन्छ । यो सदाबहार र एक पटक लगाएपछि अर्को पटक लगाउन नपर्ने बिरुवा पनि हो ।

गाईले न्यूरोडको डिभाइडरका बिरुवा खाँदै गरेको अवस्थामा सुरज हजारे दाहालले खिचेको तस्वीर