पोखराका अस्पतालहरुमा बिहानैदेखि ओपिडी सेवा प्रभावित बनेको छ । पूर्वान्हदेखि सबैमा ईमर्जेन्सी बाहेकका स्वास्थ्य सेवा ठप्प बन्यो । अहिले भर्खरै मात्र नेपाल चिकित्सक संघले माग पूरा नभई गण्डकी प्रदेशभर सेवा दिन नसकिने भनी विज्ञप्ती जारी गरेको छ ।

एशोसिएसन अफ प्राइभेट हेल्थ इन्स्टिच्युसन अफ नेपाल (अफिन), गण्डकीले पनि चिकित्सकमाथि कुटपिट र अस्पताल तोडफोडको  घटनामा बिरोध जनाउँदै विज्ञप्ती जारी गर्ने तयारीमा रहेको सूचना प्राप्त भएको छ ।

नेपाल चिकित्सक संघ, गण्डकीका कार्यवाहक अध्यक्ष डा. सुनिल पनेरु र सचिव डा. सुशिल तिमल्सिनाले विज्ञप्ती जारी गर्दै ३ बुँदे माग पूरा नहुन्जेल ईमर्जेन्सी बाहेकका सबै सेवा बन्द गर्न बाध्य भएको बताएका छन् ।

अस्ति असोज ७ गते लमजुङ अस्पतालमा र हिजो असोज ८ गते मणिपाल अस्पताल पोखरामा चिकित्सकमाथि कुटपिट भएको बिरोधमा चिकित्सकहरु आन्दोलित भएका हुन् । ३ बुँदे मागमा पहिलो बुँदामा कुटपिट र अस्पताल चोडफोडमा उत्रने दोषीमाथि स्वास्थ्यकर्मी तथा स्वास्थ्य संस्थाको सुरक्षा सम्बन्धी पहिलो संशोधन ऐन २०७९ अनुसार कारबाही गर्नुपर्ने रहेको छ ।

मणिपालमा चिकित्सकमाथि हमलामा प्रहरी नै संलग्न भएकाले दोषी प्रहरीहरुलाई कडा भन्दा कडा कारबाही गर्नुपर्ने र कारबाही गरिएको लिखित जानकारी दिन माग गरिएको छ ।

यस्तै, दोषीहरुलाई गरिएको कारबाही सम्बन्धी जानकारी नेपाल सरकारको छाप सहित सम्पूर्ण स्वास्थ्य संस्थाहरुमा उपलब्ध गराउनुपर्ने साथै सार्वजनिक सञ्चार माध्यमद्वारा सम्पूर्ण जानकारी गराउनुपर्ने माग रहेको छ ।

हिजो मनिपाल अस्पतालमा चिकित्सक डा. अनिल शाहमाथि पोखरा ५ मालेपाटनका विनय गुरुङले कुटेपछि ठूलो भीड जम्मा पारी अस्पताल तोडफोड गरिएको थियो ।

अस्ति लमजुङ अस्पतालमा ड्यूटीमा रहेका डा. सन्दीप अधिकारीलाई बेसीशहर नगरपालिका– ७ का वडाध्यक्ष ऋषिराम बस्नेतले कुटपिट गरेका थिए ।

काठमाण्डौमा डाक्टरहरुको प्रदर्शन

चिकित्सकमाथि कुटपिटको विरोधमा काठमाडौंमा चिकित्सकहरुले प्रदर्शन गरेका छन् । माइतीघर मण्डलमा ठूलो संख्यामा भेला भएका चिकित्सकले आफूहरुको भौतिक सुरक्षाको माग गरेका छन् । सेतो कोट लगाएर प्रदर्शनमा उत्रिएका चिकित्सकहरुले आक्रमणकारीले कडा कारबाही गर्ने कानुन बनाउन पनि माग गरे ।

उनीहरुले ‘दोषीलाई खुल्ला छुट डाक्टरमाथि बुटैबुट’, ‘अस्पतालमा नआउ, डाक्टर बिरामीको दुवैको ज्यान बचाउ’, ‘डाक्टर कुट्न पाइँदैन’, ‘पेशा छोडौं कि देश छोडौं’ ? लगायतका प्लेकार्ड बोकेर नारा लगाइरहेका छन् । चिकित्सकको प्रदर्शनका क्रममा प्रहरीसँग धकेलाधकेल पनि भएको थियो ।

पछिल्लो समय अस्पतालमा डाक्टरमाथि कुटपिट तथा हातपातको घटना सार्वजनिक भइरहेका छन् । दुई साता अघि हेटौंडामा दुई चिकित्सक कुटिएपछि स्वास्थ्यकर्मी आन्दोलिन बनेका थिए । गत साता पनि कञ्चनपुरका स्वास्थ्यकर्मीमाथि हातपात भएको थियो । स्वास्थ्य केन्द्रका अहेबमाथि मध्यराति ड्युटीमा खटिएको बेला हातपात भएको हो।

सम्बन्धित समाचारः

पोखराको मणिपाल र लमजुङ अस्पतालमा डाक्टर कुटिएपछि इमर्जेन्सी बाहेकका सबै सेवा बन्द

बिरामीको मृत्युपछि पोखरा मणिपालका डाक्टरमाथि हातपात

लमजुङमा डाक्टर कुट्ने वडा अध्यक्ष बस्नेत प्रहरी हिरासतमा