पोखरा । प्रधानमन्त्री पुष्पकमल दाहाल ‘प्रचण्ड’को भ्रमणमा क्रममा भारतले अनुदानमा दिएको मुर्रा राँगा पोखरा आइपुगेका छन् ।

नेपाललाई दिइएको १५ राँगामध्ये कास्कीको पोखरामा ७ वटा ल्याइएको हो । ५ वटा सिरहाको लहान र ३ वटा बाँकेको नेपालगन्जमा राखिएको छ ।

शुक्रबार आइपुगेका राँगा पोखराको राष्ट्रिय पशु प्रजनन कार्यालय भेडीफाराममा राखिएको छ । नेपालगन्जबाट बुटवल पाल्पा हुँदै पोखरा ल्याइएको राँगालाई प्रजनन कार्यालयमा फूलमालाले स्वागत गरिएको थियो ।

ति रांगाहरुलाई एक महिना क्वारेन्टिनमा राखिने र त्यसपछि विर्य संकलन थालिने कार्यालयले जनाएको छ । पशु प्रजनन कार्यालयमा हाल १ सय ७८ वटा भैँसी, ५२ वटा गाई, २ सय ५ वटा बोयर बोका, २ सय ६७ वटा बंगुर र ७ हजार भन्दा बढी कुखुरा तथा ८४ वटा भेडा छन् । राँगा र साँढे ६० वटा छन् । उनीहरूबाट वीर्य सङ्कलन गरेर किसानको गोठमा पठाइन्छ ।

पोखराका मेयर धनराज आचार्यले यस राँगाले यसबाट पोखरा र यस क्षेत्रमा उच्च जात र नश्लको भैँसी पालक कृषकहरु बिशेष लाभान्वित हुने बताए ।

उनले भने – ‘भारतबाट उन्नत नश्लका मुर्रा जातका राँगा ल्याउने काम पूरा भएको छ । १५ मध्ये ७ राँगा पोखरास्थित पशु प्रजनन विकास केन्द्र (भेडीफाराम) मा ल्याइएको छ। यसबाट पोखरा र यस क्षेत्रमा उच्च जात र नश्लको भैँसी पालक कृषकहरु बिशेष लाभान्वित हुनुहुनेछ। यस अतुलनिय प्रयासको लागि सम्पूर्ण सहयोगी हातहरुप्रति हार्दिक आभार’