पोखरामा भएको अन्तर्राष्ट्रिय माउन्टेन बाइक रेसमा पोखरा एन्ड्युरोको उपाधि इन्डोनेसियाका रामा तेगुले प्राप्त गरेका छन् । उनले ५ स्टेज (ट्रयाक) को ११.९२० किलोमिटर दुरी ९ मिनट ५९ सेकेण्डमा पार गर्दै उपाधि जितेका हुन् ।

९ विधामा इलित पुरुषतर्फको उपाधि जितेका उनले नगद ५० हजार रुपैयाँसमेत पाए । यो विधामा युकेका क्रिस्टोफर किलिङले १० मिनेट १६ सकेन्डमा दुरी पार गर्दै दोस्रो भए ।

नेपालका प्रचित थापाले १९ मिनेट ३६ सेकेन्डमा दुरी पार गदैै तेस्रो स्थान हासिल गरेका छन् । दोस्रो र तेस्रोले क्रमशः ३० हजार र २० हजारको साथमा प्रमाणपत्र, मेडलसहित गिफ्ट ह्याम्पर प्राप्त गरेका छन् ।

महिलातर्फ नेपालकी लक्ष्मी मगर विजेता बनेकी छन् । उनले साढे १० किलोमिटर दुरी ९ मिनेट ५३ सेकेन्डमा पूरा गरिन् ।

नेपालकै मिङमा याङ्जी शेर्पाले उपविजेता र सिंगापुरकी इभोना सियाले तेस्रो स्थान हासिल गरे । उनीहरुले क्रमशः ११ मिनेट २५ सेकेन्ड, १५ मिनेट ३५ सेकेन्ड समय लगाए ।

विजेता, उपविजेता र तेस्रो हुनेले क्रमशः नगद ३५ हजार, २५ हजार र १५ हजार हजार रुपैयाँसहित प्रमाणपत्र, मेडल र गिफ्टह्याम्पर पाएका छन् ।

१८ वर्षसम्मका पुरुष जुनियर तर्फ नेपालका बिपुल विजेता भए । उनलाई पछ्याउदै अमेरिकाका एलिजा स्टेवार्ड दोस्रो र नेपालका दिपेश थापा तेस्रो भए । उनीहरुले प्रमाणपत्र, मेडलका साथमा गिफ्ट ह्यापर प्राप्त गरे ।

३० देखि ३९ वर्ष उमेर समूहको मास्टर्स ‘क’ विधामा राजन भण्डारी विजेता हुँदा, मंगल लामा दोस्रो र कुंगा वोसेर तेस्रो स्थानमा आए ।

४० देखि ४९ वर्ष उमेर समूहको मास्टर्स ‘ख’ विधामा सुरज पाण्डेले विजेता भए । रवि कार्कीले दोस्रो र नारायण मानन्धरले तेस्रो स्थान हासिल गरे ।

५० वर्षमाथि उमेर समूहका भेट्रानतर्फ लाल आले, सुलोचन राजभण्डारी र सैशव प्रधानले क्रमशः पहिलो दोस्रो र तेस्रो स्थान ल्याए ।

नेपालमै पहिलो पटक आयोजना भएको ‘इ–बाइक’ विधामा प्रशन्न गौतम विजेता भए । विश्वास मोदी दोस्रो भए ।

माउन्टेन बाइक कम्पनी डन टिल डस्कको आयोजनामा पोखरा महानगरपालिका–१३ को आर्बा–बिजय डाँडामा ३ दिनससम्म चलेको प्रतियोगितामा नेपालसहिति ११ देशका ५६ खेलाडीले सहभागिता जनाएका थिए ।