पोखरा । अब पालिखेचोक फराकिलो हुने भएको छ । चार दशक अघिदेखि विवादमा रहेका पालिखेचोकका घरहरु भत्काउन सुरु गरिएको छ । बिहीबार वसन्त उदास, मिश्री उदास र दुधमान उदासको नाममा रहेको घरमा डोजर लगाइएको छ ।

४ जग्गाधनीमध्ये २ जनाले मुआब्जा बुझिसकेका छन् भने बाँकी २ जनाले पनि मुआब्जा बुझ्न सहमत भइसकेका छन् । बाँकी ३ घर पनि हप्तादिनभित्रै भत्काउने गरी योजना अगाडि बढिरहेको पोखरा ४ का अध्यक्ष शंकर बास्तोलाले जानकारी दिए ।

वसन्त परिवारसँगै प्रदीपशंकर पालिखेले पनि घर भत्काउनका लागि मुआब्जा बुझिसकेका छन् । बसन्त उदासको नाममा सूचना जारी भएपनि सोही कित्तामा ३ जनाको संयुक्त लालपुर्जा रहेकोले तीनैजनाको नाममा रकम निकासा गरिएको महानगरपालिकाले जनाएको छ । मुआब्जा दिनुपर्ने जग्गाको मूल्य प्रतिबर्ग मिटर १ लाख २० हजार रुपैयाँका दरले तोकेको छ । पालिखेचोकको १ सय ९९ वर्गमिटर जग्गा अधिग्रहण गरिएको छ ।

वसन्त परिवारले ७६ लाख १६ हजार ५ सय ९७ रुपैयाँ मुआब्जा बुझिसकेका थिए । घरको क्षतिपूर्ति ४ लाख ११ हजार ५० र जग्गाको क्षतिपूर्ति ७२ लाख ७२ हजार रुपैयाँसहितको मुआब्जा उनीहरुले बुझेपछि घर भत्काइएको हो ।

यस्तै किशोरीदेवी श्रेष्ठ, प्रदीप शंकर पालिखे र कृष्णमान श्रेष्ठको घर पनि भत्काउन मुआब्जा निर्धारण भइसकेको छ । किशोरीदेवीले ७३ लाख १६ हजार ५ सय ९७ रुपैयाँ मुआब्जामा सहमति गरिसकेकी छन् भने प्रदीपशंकरले पनि ४४ लाख ६२ हजार ८ सय ९१ रुपैयाँ मुआब्जा लिने सहमति जनाइसकेका छन् । कृष्णमान श्रेष्ठको नाममा रहेको घर भत्काउन ६४ लाख २१ हजार ७ सय ५२ रुपैयाँ मुआब्जा लिएर घर भत्काउने सहमति भएको वडाध्यक्ष बास्तोलाले जानकारी दिए ।

पहिलो चरणमा उदास परिवारको घर भत्काईएको र बाँकी रहेका घरहरु पनि १५ दिनभित्रै भत्काईसक्ने वडाध्यक्ष बास्तोलाले जानकारी दिए । ‘टेलिकमको बाक्सा सार्नुपर्नेछ । एउटा घर भत्काएपछि बाक्सा सार्न मिल्छ, उनले भने–त्यो सारिसकेपछि बाँकी रहेका घरहरुपनि भत्काउँछौं ।’

वडा नम्बर ३ अन्तर्गत पालिखेचोक अन्तर्गत सडक मापदण्डभित्र परेका र नयाँ घर बनाउनसमेत नमिल्ने जग्गामा रहेको घर भत्काउन यसअघि प्रमुख जिल्ला अधिकारीको संयोजकत्वमै मुआब्जा निर्धारण समितिले गरेको निर्णयअनुसार काम अगाडि बढाइएको हो । लामो समयदेखि विवादित रहेको पालिखेचोकका घर भत्काउन प्रयास गरिए पनि सफल हुन सकेको थिएन ।

यी घर भत्काइएसँगै अब पालिखेचोक पनि फराकिलो हुने भएको छ । साँघुरो चोक भएकाले पालिखेचोकमा गाडी जामको समस्यासमेत बढ्दै गइरहेको थियो । ४ दशकअघि नै तत्कालीन अञ्चलाधीश शंकर पाठकले पनि ती घर भत्काएर सडक फराकिलो बनाउन खोजेको जानकार बताउँछन् । स्थानीयको बिरोधका कारण सम्भव भएको थिएन । त्यसपछि पोखरा उपत्यका नगर विकास समितिले पटकपटक यी घर भत्काउने प्रयास गरेका थिए ।

पोखरा नगरपालिकादेखि उपमहानगरका जनप्रतिनिधीको प्रयास पनि सफल भएन । तर अहिले भने जनप्रतिनिधीको काममा स्थानीयले पनि सहयोग गरे । नयाँ संरचनामा जनप्रतिनिधी निर्वाचित भएकै वर्षदिनभित्र मापदण्डभित्रका घर भत्काउन सफल भएको हो । विहिबार बसन्त उदास, मिश्री उदास र दुधमान उदासको नाममा रहेको जग्गाभित्रको दुईतले घर भत्काईएको हो ।