पोखरामा तीनदिने कृषि यान्त्रिकरण एक्स्पो हुने भएको छ । ‘कृषिमा यान्त्रीकरणको अवलम्बन, कृषि कार्यमा परिवर्तन’ भन्ने नाराका साथ पहिलो पटक प्रादेशिकस्तरीय कृषि यन्त्र र प्रविधि सम्बन्धी बृहत प्रर्दशनी गर्ने गरी एक्स्पो गर्न लागिएको हो ।

पोखराको नयाँबजारस्थित प्रर्दशनी केन्द्रमा यही पुष २० गतेदेखि २२ गतेसम्म गण्डकी प्रदेशस्तरीय एक्सपोको आयोजना गरिएको हो । तीन दिने प्रदर्शनीमा कृषि यन्त्र र प्रविधि सम्बन्धि बृहत् प्रदर्शनी हुने जनाइएको छ । पोखराको नयाँबजारस्थित प्रदर्शनी केन्द्रमा हुन गइरहेको प्रदर्शनीमा ४० भन्दा बढी प्रदर्शनकर्ताहरुले एक हजार भन्दा बढी यन्त्र तथा उपकरण प्रदर्शन गर्नेछन् ।

एक्स्पोमा करिव ५ करोड मूल्य बराबरको कारोबार हुने अनुमान गरिएको छ । कृषक, उद्यमी, व्यवसायी, कृषि विज्ञ, राजनीतिकर्मी, विद्यार्थी, कर्मचारी लगायत गरी करिब २० हजारले उक्त एक्स्पोको अवलोकन गर्ने लक्ष्य आयोजकले राखेको छ ।

नेपाल कृषि मेशिनरी व्यवसायी संघ (नामिया) का अध्यक्ष कृष्ण शर्माका अनुसार यो बर्षको एक्सपोमा कृषि पूर्वाधार विकास तथा कृषि यान्त्रीकरण प्रर्वद्धन केन्द्र, कृषि विकास निर्देशनालय, गण्डकी र पोखरा महानगरपालिकाले सह-आयोजकको रुपमा सघाएका छन् ।

त्यसैगरी, ग्रामिण उद्यम तथा आर्थिक विकास आयोजना (रीड), खाद्य तथा पोषण सुरक्षा सुधार आयोजना (फ्यानसेप), नेपाल लाइभ स्टक सेक्टर इन्नोभेसन आयोजना (एनएलएसआईपी) र राष्ट्रिय कृषि ईन्जिनियरिङ्ग अनुसन्धान केन्द्र खुमलटारले पनि सहकार्य गरेको छ । एक्सपोको प्रवर्द्धन प्रधानमन्त्री कृषि आधुनिकिकरण परियोजनाले गर्ने भएको छ ।

एकै थलोमा आधुनिक प्रविधि कृषि औजार र उपकरणर तथा सेवाका बारे जानकारी गराउन, नीति निर्माता तथा उपभोक्तालाई कृषिखयान्त्रीकरण प्रविधि सम्बन्धी चेतना जगाउन प्रवर्द्धनमा योगदान पुर्याउन र कृषि यान्त्रीकरणको बजार विस्तार गर्ने उद्देश्यले यो एक्सपोको आयोजना गरिएको हो ।