स्याङ्जाको चापाकोटमा सञ्चालित स्वर्गीय सन्तोष थापा स्मृति कप २०८० को भलिबल प्रतियोगितामा स्याङ्जालाई पराजित गर्दै बागलुङले उपाधि जित्न सफल भएको छ ।

आइतबार भएको फाइनलमा पहिलो सेट गुमाएपछी खेलमा फर्केर बागलुङले स्याङ्जालाई ३-१ को सेटमा २५–२७, २५–२०, २५–२१ र २५–२१ अङ्कले पराजित गरेर प्रथम स्व. सन्तोष थापा स्मृति कपको उपाधि हासिल गरेको हो ।

विजेता भएको बागलुङ जिल्लाले उपाधिसङ्गै १ लाख ५० हजार नगदसहित ट्रफी र मेडल, उपविजेता भएको स्याङ्जा जिल्लाले १ लाख नगदसहित ट्रफी र मेडल तथा तृतीय स्थान प्राप्त गरेको पर्वत जिल्लाले ५० हजार नगदसहित ट्रफी र मेडल प्राप्त गरेका हुन् ।

त्यस्तै खेल अवधिमा उत्कृष्ट खेलाडी बनेका बागलुङका रवि के.सी., उत्कृष्ट स्पाईकर बागलुङका रेशम छन्त्याल, उत्कृष्ट ब्लकर पर्वतका रुपेन्द्र नेपाली, उत्कृष्ट सेटर बागलुङका मीन सुनार, उत्कृष्ट डिफेन्डर बागलुङका कुन्जन शाही र उत्कृष्ट सर्भर स्याङ्जाका बिजय थापा तथा उत्कृष्ट कोच बागलुङका सुरेन्द्र के.सी.ले जनही ३ हजार नगदसहित ट्रफी प्राप्त गरेका हुन् ।

चापाकोट उद्योग वाणिज्य संघद्वारा आयोजित दोस्रो चापाकोट महोत्सव तथा व्यापार मेला २०८० को अवसर पारी नगर खेलकुद विकास समितिको समन्वयमा `स्वास्थ्यका लागि खेलकुद, राष्ट्रका लागि खेल्कुद´ भन्ने मुल नारासहित गण्डकी प्रदेशका पुरुष भलिबल टीमका सदस्य स्वर्गीय सन्तोष थापाको स्मृतिमा चापाकोट नगरपालिका – ९ स्थित गङ्गालाल मा.वि. खेलमैदान, सुन्तलीटारमा भलिबल प्रतियोगिता गरिएको खेल संयोजक राजन दर्लामी मगरले जानकारी दिए ।

गण्डकी प्रदेशका कुशल खेलाडी रहेका चापाकोट नगरपालिका-२ धुर्कोटका सन्तोष थापाको गत कार्तिक २७ गते मोटरसाइकल दुर्घटनामा मृत्यु भएको थियो । उनकै स्मरणमा भलिबल प्रतियोगिता आयोजना गरिएको हो ।

आइतबारसम्म रहेको प्रथम सन्तोष थापा स्मृतिकपको आमन्त्रित जिल्ला स्तरीय खुला पुरुष भलिबल प्रतियोगितामा गण्डकी प्रदेशका स्याङ्जा, पर्वत, नवलपुर, तनहुँ, कास्की, बागलुङ र लुम्बिनी प्रदेशको पाल्पा जिल्लाको सहभागिता रहेको थियो ।