पोखरा । वडा प्रहरी कार्यालय बैदाम कास्कीको प्रहरी टोलिले पोखराका विभिन्न स्थानबाट लागूऔषध सहित ३ जनालाई पक्राउ गरेको छ ।

पक्राउ पर्नेमा पोखरा ९ महेन्द्रपुल बस्ने वर्ष ३५ को विक्रम थापा मगर, नवलपरासी बर्दघाट सुस्ता पश्चिम रामग्राम नगरपालिका १८ सुनवल बस्ने वर्ष २८ को विष्णुनाथ उपाध्याय र सोही ठाउँ घर भई पोखरा ५ जिरो किमि बस्ने वर्ष २१ की सुनिता खड्का रहेका छन् ।

गोप्य सुचनाका आधारमा वडा प्रहरी कार्यालय बैदामबाट सादा पोशाकमा खटिएको प्रहरी टोलीले पोखरा ५ उत्तम चोकबाट साउन २४ गते विक्रम र विष्णुनाथलाई २ सय ४५ थान लागऔषध सहित पक्राउ गरेको हो भने पोखरा ५ जिरो कि मि बाट सुनितालाई २९ थान लागूऔषध सहित पक्राउ गरेको कार्यालय प्रमुख डिएसपी नविन कार्कीले जानकारी दिए । पक्राउ परेका सबैजना उपर प्रहरीले थप अनुसन्धान गरिरहेको उनले जनाए ।

यसअघि, साउन २२ गते अस्थाई प्रहरी पोष्ट पथ्वीचोकबाट गस्तीमा खटिएको प्रहरी टोलीले चेकजाँच गर्ने क्रममा पोखरा ९ पृथ्बीचोक स्थित दिप मःम रेष्टुरेण्टबाट कपिलबस्तुको बगुनि घर भएका वर्ष १९ को शेषकान्त थारुको साथबाट फेनरागन १८० थान, डाईजेपाम १८० थान, नुरफिन १८० थान र नाईट्रोजन ट्याबलेट ३ पत्ता समेत बरामद गरी नियन्त्रणमा लिई थप अनुसन्धानका लागि जिल्ला प्रहरी कार्यालय कास्कीमा पठाईएको जनाइएको छ ।