पोखरालाई भोलि (आइतबार) पर्यटनको राजधानी घोषणा गरिँदैछ । यससंगै पोखरा चौबिसै घण्टा खुल्ला रहने सन्देश पनि दिइँदैछ ।

जिल्ला प्रशासन कार्यालय कास्कीका अनुसार शनिबार बिहान सरोकारवाला सहित बसेको जिल्ला सुरक्षा समितिको बैठकले पोखरा चौबिसै घण्टा खुल्ला गर्ने निर्णय गरेको हो ।

कास्कीका सहायक प्रमुख जिल्ला अधिकारी गंगा बहादुर क्षेत्रीका अनुसार निश्चित मापदण्ड पूरा गरेका मुख्य सहरी क्षेत्रलाई अहिले खुल्ला गरिने र त्यसपछि सिंगो पोखरालाई नै २४ सै घण्टा खुला गर्दैजाने निर्णय भएको छ ।

सुरुमा महेन्द्रपुल, चिप्लेढुंगा, पृथ्वीचोक नागढुंगाहुँदै मुस्ताङचोक, राष्ट्रबैंकचोक, ड्यामसाइड, लेकसाइड हुँदै हल्लनचोकसम्म २४ सै घण्टा खुल्ला राख्ने निर्णय भएको छ । खुल्ला हुने क्षेत्रका व्यवसायी मापदण्ड भने पूरा गर्नुपर्ने शर्त राखिएको छ ।

पर्यटकीय राजधानी घोषणा कार्यक्रमसंगै मापदण्ड सार्वजनिक गरिनेछ । मापदण्ड पूरा गरेका व्यवसायिक फर्म २४ घण्टा सञ्चालन गर्दा चहिने बाह्य सम्पूर्ण सुरक्षा प्रबन्ध प्रशासनले नै गर्ने उनले बताए ।

पोखरा २४ सै घण्टा उज्यालो र खुल्ला रहेको सन्देशले सिंगो गण्डकी प्रदेशको अर्थतन्त्र चलायमान हुने विश्वास पर्यटन तथा होटल व्यवसायीको छ ।