पोखरा । पठाओ, टुटल, इनड्राइभ जस्ता राइड शेयरिङ माध्यमलाई नियमन गर्ने कानून नै बन्न नेपालमा सकेको छैन । उच्च अदालत पाटनले कानून बनाएर नियमन गर्न भन्दै २९ माघ २०७६ मा दिएको आदेश अहिलेसम्म कार्यान्वयन नभएको अवस्था छ ।

सवारी तथा यातायात व्यवस्था ऐन २०४९ मा यातायात सेवाको नाम विभागमा पञ्जीकृत नगरी सार्वजनिक यातायात सेवा सञ्चालन गर्न नपाइने र एक प्रयोजनका लागि दर्ता भएका सवारी साधन अन्य प्रयोजनमा प्रयोग गर्न नहुने व्यवस्था छ । यसै कारण देखाउँदै राईडरहरुमाथि ट्याक्सी तथा सार्वजनिक सवारीका चालकहरु खनिन्छन् ।

नेपालमा हाल जीपीएस तथा डिजिटल प्लेटफर्मको उपयोग गरी २५ ओटा राइड शेयरिङ कम्पनी सञ्चालनमा रहेको बताइन्छ । टुटल र पठाओमा झण्डै ५० हजार राइडर आबद्ध छन् । ईनड्राइभ जस्ता नेपालमा कार्यालय नै नभएको एप चलाउनेहरु उत्तिकै छन् ।

अधिंकाश युवा राइडर रहेका तथ्यांक छ । टुटल र पठाओकै कारण उनीहरूले स्वदेशमै रोजगारी पाएका छन् । सार्वजनिक सवारी साधन समयअनुकूल चल्न नसकेका कारण टुटल–पठाओ प्रयोगकर्ता बढेका हुन् ।

हजारौँले रोजगारी पाएका पठाओ–टुटललाई बन्द होइन, कानुनी दायरामा ल्याएर व्यवस्थापन गर्नुपर्ने टड्कारो अवस्था छ ।

पोखरामा रहेर विभिन्न राईड शेयरिङ एप् मार्फत् यात्रु बोक्दै आएकाको समूहको एक भेला आज पोखरामा बस्यो । करिब ५ सय राईडरहरु सहभागी वृहत भेलामा पनि यही विषय उठ्यो ।

अनिल श्रेष्ठको संयोजकत्व तथा सुनिल भुजेलको अध्यक्षतामा भएको भेलामा वक्ताहरुले राईड शेयरिङ एपलाई चाँडो भन्दा चाँडो बैधानिकता दिएर कानुनसम्मत नीतिनियम तर्जुमा गरी कार्यान्वयन गर्नुपर्नेमा जोड दिए ।

अनिल श्रेष्ठसँगै सिर्जन गोम्जा तामाङ, खेम थापा, शैलेन्द्र केसी, किशोर गुरुङ, मिनकाजी गुरुङ, अनुप केसी, सुन्दर वाग्ले लगायतले बोले ।
उनीहरुले राईड शेयरिङ सेवामुखी काम भएको हुँदा यसलाई गैरकानुनी मान्नु गलत भएको भन्दै सरकारका केही प्रयास प्रशंसनीय रहेको पनि बताए ।

गण्डकीका निवर्तमान भौतिक पूर्वाधार तथा यातायात मन्त्री माननीय रेशम जुग्जालीले वैधानिक बनाउने बताउँदा आफूहरु उत्साही बनेको उल्लेख गर्दै उनीहरुले अबको सरकारलाई कानुन बनाउन आग्रह गरे ।

सरकारले राईड शेयरिङलाई बैधानिकता दिई आवश्यक नियमन गरेको खण्डमा आफूहरुले सरकारलाई नियमानुसार आयकर तिर्नेपनि उनीहरुको भनाई छ ।

उक्त भेलामा पोखरामा रही युवाहरुलाई उत्साहित गरी स्वरोजगार भई आत्मनिर्भर बन्न प्रेरित गरेकोमा अनिल श्रेष्ठलाई सम्मान समेत गरिएको थियो ।

भेलाले सुनिल भुजेलको अध्यक्षतामा १८ सदस्यीय तदर्थ समिति पनि गठन गरेको छ ।

कार्यक्रममा स्वागत मन्तव्य समितिका बरिष्ठ उपाध्यक्ष कुमार राना, कार्यक्रममाथि प्रकाश बिनोद ढुंगाना र सञ्चालन सचिव रिजोन बस्ताकोटीले गरेका थिए ।