पोखरा । गृहमन्त्री रवी लामिछानेसँग प्रत्यक्ष जाेडिएका सूर्यदर्शन सहकारी ठगीका मुख्य आरोपी गीतेन्द्रबाबु राई (जिबी) को राहदानी रद्द गर्न कास्की अदालतले अस्वीकार गरेको छ ।

जिल्ला प्रहरी कार्यालय कास्कीले उनको राहदानी खारेज गर्न माग गर्दै निवेदन दिएको थियो । जिल्ला न्यायाधीश हरिप्रसाद कोइरालाको इजलासले राईको राहदानी रद्द गर्ने आदेश जारी गर्न नमिल्ने आदेश दिएको हो ।

राहदानी रद्द गर्न प्रहरीले सरकारी वकिल कार्यालयमार्फत अदालतमा अनुमति मागेको थियो । राहदानी रद्द गर्नका लागि अदालतको आदेश आवश्यक हुने भएपछि निवेदन दिइएको थियो । राहदानी ऐनको दफा १२ मा सहकारी सम्बन्धी कसुर उल्लेख नभएको भन्दै अदालतले अस्वीकार गरेको हो ।

ऐनमा ‘राहदानी, अध्यागमन, भ्रष्टाचार, सम्पत्ति शुद्धीकरण, मानव बेचबिखन, अपहरण, लागु औषध, अवैध हातहतियार कारोबार, संगठित अपराध वा आतंकवाद सम्बन्धी कसुरको अभियोगमा अदालतमा मुद्दा चलिरहेको अवस्थामा अदालतको आदेश बमोजिम त्यस्ता व्यक्तिको राहदानी जारी नगर्न वा रोक्का राख्न अदालतले लेखी पठाएको’ भनेको छ ।

उक्त दफामा सहकारी ठगीको कसुर उल्लेख नै नभएकाले प्रहरीको निवेदन वा मागकै आधारमा मात्र अनुमति दिन नमिल्ने आदेशमा भनिएको छ ।

यद्यपि जिल्ला प्रहरी कार्यालय कास्कीले आइतबार नै उनको राहदानी रोक्का गर्न राहदानी विभागमा पत्राचार गरेको थियो।

प्रहरी स्रोतका अनुसार दफा १२  अनुसार नै विभागलाई राईको राहदानी रोक्का गर्न माग गरेको हो।

दफा १२ को १ (घ)मा बैं तथा वित्तीय संस्थाको ऋण तिर्न नसकी प्रचलित कानुन बमोजिम कालो सूचीमा परेको भन्ने उल्लेख छ। यसबारे पत्र लेखिएको भएपनि राहदानी विभागले अध्ययनकै चरण रहेको बताएको छ।