पोखरा। गण्डकी प्रदेशका नवनियुक्त मुख्यमन्त्री सुरेन्द्रराज पाण्डेले केहीबेरमा २ मन्त्रीसहित सपथ लिने भएका छन् । कांग्रेसका बिन्दुकुमार थापा र डा. टकराज गुरुङलाई लिएर सपथ लिने जानकारी प्राप्त भएको छ ।

बाँकी मन्त्रालय आफूसँगै राख्दै तीन सदस्यीय मन्त्रिमण्डल गठनको पत्र मुख्यमन्त्रीले प्रदेश प्रमुखको कार्यालयमा पठाएकाे बताइन्छ । आफूसँगै २ मन्त्रीले सपथ लिने जानकारी मुख्यमन्त्री पाण्डेले प्रदेश प्रमुखलाई दिएको प्रेस संयोजक रञ्जन अधिकारीले जानकारी दिए ।

मन्त्रीको नाम र जिम्मेवारीबारे भने औपचारिक जानकारी प्राप्त नभएको उनले बताए ।

यद्यपी, श्रोतका अनुसार लमजुङका गुरुङले अर्थ र कास्कीका थापाले उर्जा र सामाजिक विकास तथा स्वास्थ्य गरी २ मन्त्रालयको जिम्मा पाउने भएका छन् ।

थापा दोस्रोपटक प्रदेश मन्त्री हुन लागेका हुन् । यसअघि उनी कानुन मन्त्री भएका थिए । टकराज पहिलोपटक मन्त्री बन्न लागेका हुन् । उनी गण्डकी प्रदेशसभा सदस्यका पहिलाे र एक मात्रै पिएचडी गर्ने सांसद हुन् ।

गण्डकीमा कांग्रेसका २७, नेकपा एमालेका २२, माओवादी केन्द्रका सभामुखसहित ८, राप्रपाका २ र एक जना स्वतन्त्र सांसद छन् । ६० सदस्यीय प्रदेशसभामा बहुमत संख्या ३१ जना हुनुपर्छ ।

सर्वोच्चको परमादेश अनुसार नियुक्त भएका मुख्यमन्त्री पाण्डेले बुधबार सभागृह हलमा आयोजित कार्यक्रममा सपथ लिन लागेका हुन् ।