काठमाण्डौँ । नेपाल पत्रकार महासंघको केन्द्र, प्रदेश, जिल्ला, प्रतिष्ठान र एशोसियट तर्फको एकैपटक हुने निर्वाचन तोकिएकै मिति जेठ २६ मै गर्न ६ संगठनहरुले ध्यानाकर्षण गराएका छन् ।

विभिन्न संगठनहरुले शनिवार संयूक्त प्रेस विज्ञप्ती सार्वजनिक गर्दै महासंघको निर्वाचनको मिति कुनै पनि बाहानामा नधकेल्न नेतृत्वलाई दवाव दिएका हुन् । प्रेस चौतारी नेपाल, प्रेस सेन्टर नेपाल, समाजवादी प्रेस संगठन, प्रगतिशिल पत्रकार संघ, जनपत्रकार संगठन र क्रान्तिकारी प्रेस संगठनले विज्ञप्ती जारी गर्दै महासंघको केन्द्रीय नेतृत्वबाटै निर्वाचन गर्ने विषयमा अवरोध सृजना भइरहेको आरोप लगाएका छन् । अहिले नेतृत्व काँग्रेस निकट प्रेस यूनियनको छ ।

सदस्यहरुको अद्यावधिक नामावली निर्वाचन समितीलाई तत्काल बुझाउन समेत संगठनहरुले महासंघको ध्यानाकर्षण गराएका छन् । नेपाल पत्रकार महासंघको २०८१ वैशाख २१ र २२ गते सम्पन्न केन्द्रीय महाधिवेशनले जेठ २६ गते देशभर एकैपटक निर्वाचन गर्ने मिति घोषणा गरेको थियो । महासंघको विधान बमोजिम सवै समिति, प्रतिष्ठान र एशोसियटको तीन वर्षे कार्यकाल २०८० चैतमा सकिएको छ ।

उता नेपाल पत्रकार महासंघका अध्यक्ष विपुल पोख्रेलले शनिवार नै प्रेस विज्ञप्ती जारी गर्दै अहिलेसम्म महासंघले सदस्यहरुको आधिकारिक नामावली प्रकाशन नगरेको बताएका छन् ।

निर्वाचन समिति मार्फत प्रकाशित हुने मतदाता नामावलीमा त्रुटी सच्चाउने र छुटेका पत्रकारहरुको नाम समेट्न सकिने भएकाले महासंघको कार्यालयमा लागेको ताला खोलेर निर्वाचन सम्पन्न गर्ने वातावरण मिलाउन आग्रह गरेका छन् । पत्रकार महासंघको केन्द्रीय कार्यालय संचारग्राममा विभिन्न पाँच वटा संगठनहरुले ताला लगाएका छन् ।