पोखरामा मोटरसाइकल दुर्घटना हुँदा एक जनाको मृत्यु भएको छ। चालक घाइते भएका छन् ।

आज  बिहान ८ बजे पोखरा महानगरपालिका–१३, गौँडाकोमुखस्थित विपीमार्गबाट लामाचौरतर्फ जाँदै गरेको ग १ ख ६३९४ नम्बरको टिप्परकाे पछाडि भागमा सोही दिशातर्फ जाँदै गरेको लु ८७ प ९५२० नम्बरको मोटरसाइकल ठक्कर खाँदा दुर्घटना भएको कास्की प्रहरीले जनाएको छ ।

दुर्घटनामा परी मोटरसाइकल चालक पोखरा महानगरपालिका–१४ चाउथे बस्ने २९ वर्षीय कमल थापा क्षेत्री र स्याङ्जाको अर्जुनचौपारी गाउँपालिका घर भई पोखरा १३ काँहुखोला बस्ने बबिता रिमाल घाइते भएकी थिइन् ।

घाइते मध्ये गम्भीर भएकी रिमालको गण्डकी मेडिकल कलेजमा उपचारको क्रममा बिहान १०ः ३४ बजे मृत्यु भएको हो ।

मोटरसाइकल चालक थापाको भने उपचार भइरहेको प्रहरीले जनाएको छ । थापाको दुवै खुट्टा र दाँया हातमा चोट, अवस्था सामान्य रहेको छ ।

दुर्घटनापछि टिप्पर र चालकलाई प्रहरी नियन्त्रणमा छन् ।

यसअघि, प्रहरीले मोटरसाइकलले ओभरटेक गर्ने क्रममा टिप्परसँग ठक्कर खाएको भन्ने जानकारी गराएको थियो । तर, प्रत्यक्षदर्शीका अनुसार मोटरसाइकल अगाडि र टिप्पर पछाडि थियो । मोडनेर आइपुग्दा बाइक थोरै स्लो गरेको बेला टिप्पर अगाडि बढेको थियो र पछिल्लो भागसँग ठक्कर खाएको थियो ।

बाइकले ओभरटेक गर्न खोजेको नभई टिप्परले नै ओभरटेक गर्दा लछारेको प्रत्यक्षदर्शीले जनाएका छन् । ठक्करपछि बबिता टिप्पर पट्टी र चालक कमल अलिक टाढा पछारिएका थिए ।

*’टिप्परमा पछाडिबाट मोटरसाइकल ठक्कर खाँदा’ भनी कास्की प्रहरीले  पठाएको ईमेल अनुसार अद्यावधिक गरिएको ।  साथै, प्रत्यक्षदर्शीको भनाई अनुसार  विवरण थप गरिएको ।