प्रदेश सरकारको नीति तथा कार्यक्रममा विपक्षमा रहन भन्दै लगाइएको ह्वीप पालना नगरेको भन्दै नेकपा एमाले संसदीय दल, गण्डकीले पार्टीका एक सांसदलाई स्पष्टीकरण सोधेको छ ।

सांसद गणेशमान गुरूङलाई पार्टीले शनिबार स्पष्टीकरण सोधेको हो । तीन दिनभित्र जवाफ पठाउन भनी विधानअनुसार स्पष्टीकरण सोधिएको प्रमुख सचेतक गोविन्दबहादुर नेपालीले जानकारी दिए ।

प्रदेशसभामा सभामुख कृष्णप्रसाद धितालले शुक्रबार नीति तथा कार्यक्रम निर्णायार्थ प्रस्तुत गरेको समयमा सांसद गुरूङ सभामा थिएनन् । तर, त्यस बैठकमै गुरूङ अनुपस्थित भने भएका हैनन् । नीति तथा कार्यक्रममाथि उनले आफ्नो धारणा राखेका थिए र नीति तथा कार्यक्रम निर्णयार्थ प्रस्तुत हुने बेला उनी निस्किसकेका थिए ।

निर्णयार्थ प्रस्तुत गर्दा विपक्षमा रहनू भनेर दलले ह्वीप लगाएको प्रमुख सचेतक नेपाली बताउँछन् । तर, गुरूङ भने ह्वीप लगाउने कुरा दलको बैठकमा नभएको बताउँछन् । मोबाइल संसदमा लैजान बिर्सेकाले ह्वीपबारे थाहा नभएको सांसद गुरूङको भनाइ छ ।

उनले त्यसदिन मोबाइल संसदमा लैजान बिर्सिएको बताउँदै पछि मात्रै संसद बैठक चलिरहेको समयमा म्यासेज आएको थाहा भएको बताए ।प्रमुख सचेतक नेपालीले भने स्पष्टीकरण आएपछि थप प्रक्रिया अघि बढाइने  बताउँछन् ।