पोखराको लेकसाइडस्थित हल्लनचोकमा हाइलक्स गाडी र मोटरसाइकल एक आपसमा ठक्कर खाएर भएको दुर्घटनामा मोटरसाइकल चालकको ज्यान गएको छ ।

कास्की प्रहरीका अनुसार मृत्यु हुनेमा पोखरा ८ बस्ने २६ वर्षीय ईश्वर परियार रहेका छन् ।

आज सबेरै पौने ६ बजे पोखरा महानगरपालिका वडा नं. ६ हल्लनचोकमा ग ३ च ३४५७ नं. को हाईलक्स गाडी र ग ११ प ९१ नं को मोटरसाइकल एक आपसमा ठक्कर खान पुगको थियो ।

दुर्घटनापछि मोटरसाइकल चालक परियार घाइते भई उपचारको लागि गण्डकी मेडिकल कलेज पोखरा पठाएकोमा पौने ७ बजे उपचारको क्रममा चिकित्सकद्वारा मृत्यु घोषणा गरेको कास्की प्रहरीले जानकारी दिएको छ ।

वडा प्रहरी कार्यालय बैदाम कास्कीबाट प्रहरी टोली खटिई गई दुवै सवारी साधन र हाईलक्स चालक जिल्ला बर्दिया ठाकुर बाबा न.पा. ८ स्थायी घर भई हाल जिल्ला कास्की पोखरा वडा नं.१७ ड्यामसाईड बस्ने वर्ष ३० को सुशिल दहितलाई नियन्त्रणमा लिई अनुसन्धान कार्य भइरहेको प्रहरीले जनाएको छ ।

अन्नपूर्णमा भएको दुर्घटनामा पुष्पराजको मृत्यु

यसअघि, कास्कीमा नै भएको सवारी दुर्घटना हुँदा अर्का एक जनाको ज्यान गएको छ । मृत्यु हुनेमा अन्नपूर्ण गाउँपालिका वडा नं. ३ लक्ष्मी देउरालीका ४२ वर्षीय पुष्पराज पौडेल छन् ।

दुर्घटनामा गम्भीर घाइते भएका पौडेलको मणिपाल शिक्षण अस्पतालमा उपचारको क्रममा मृत्यु भएको प्रहरीले जनाएको छ ।

कास्की प्रहरीका अनुसार शुक्रबार राति अन्नपूर्ण गाउँपालिका वडा नं. ३ चुइनेपहरास्थित सडकमा बिएए ४४४८ नम्बरको स्कारपियो र ना३५प ६७३१ नम्बरको मोटरसाइकल एकआपसमा ठक्कर खाई दुर्घटना भएको हो ।

मृत्यु हुने पौडेल मोटरसाइकल चालक भएको प्रहरीले जनाएको छ । स्कारपियो चालकलाई प्रहरीले नियन्त्रणमा लिएको छ ।