पोखरा । नेकपा एमालेले गण्डकी प्रदेश सरकारमा आफ्नो भागमा परेको ४ मन्त्रालयमा नेतृत्व गर्ने मन्त्रीको नाम टुंग्याएको छ ।

संसदीय दलका नेता खगराज अधिकारीले कास्कीका प्रकाशबहादुर केसी, बागलुङका कृष्ण पाठक, पर्वतका मित्रलाल बस्याल र नवलपुरकी पद्मा जिसीको नाम फाइनल गरेको स्रोत बताउँछ । उनीहरुको आजै दिउँसो शपथ ग्रहण गराउने तयारी छ ।

आइतबार बसेको मन्त्रिपरिषद् बैठकले हाल कायम ७ मन्त्रालय टुक्राएर ९ वटा कायम गरिएसँगै एमालेबाट ४ जना मन्त्री थपिने भएका हुन् ।यसपटक मन्त्रीमा कुनै अनुहार दोहोरिएनन् ।

गुट र भूगोलसमेत मिलाएर दलका नेता अधिकारीले आज बिहानमात्रै नाम टुंगो लगाएको उनी निकट स्रोतले बतायो । नेता अधिकारी यसैका लागि शनिबार काठमाडौँ गएका थिए । अधिकारीले प्रधानमन्त्री एवं अध्यक्ष केपी शर्मा ओलीलाई आइतबार भेटेपछि मन्त्री बन्ने सांसदको नाम टुंगो लागेको हो ।

केसी र पाठक खगराज अधिकारी निकट तथा बस्याल र जिसी पृथ्वीसुब्बा गुरुङ निकट मानिन्छन् ।

पर्वत प्रदेश सभा ‘ख’बाट निर्वाचित बस्यालले प्रदेश सभाको ज्येष्ठ सदस्य भएर सभाध्यक्षको भूमिकासमेत निर्वाह गरेका थिए । नवलपुरकी पद्मा जिसी यसअघि नै मन्त्री बन्ने चर्चा थियो । पद्मा संसदका सक्रिय महिला सांसदमध्ये एक हुन् । उनी नवलपुर २ (१)बाट निर्वाचित हुन् ।

यसैगरी, बागलुङका पाठक सिधै केन्द्रमा पहुँच राखेकाले यसपटक मन्त्री बन्ने निश्चित नै थियो । पाठक अध्यक्ष केपी शर्मा ओली र महासचिव शंकर पोखरेलनिकट हुन् ।

प्रकाशबहादुर केसी राप्रपाबाट एमाले प्रवेश गरी खगराजकै जोडबलमा समानुपातिक सांसद बनेका हुन् । समानुपातिकबाट अवसर दिएका  केसीलाई फेरि अवसर दिँदै मन्त्री बनाउने भएसँगै एमाले सांसदहरूले असन्तुष्टि व्यक्त गरिरहेका छन् । २२ जना सदस्य रहेका एमालेबाट मन्त्री हुनेमा धेरै जना आकांक्षी थिए ।

पृथ्वीसुब्बा समूहका कास्कीका भीम कार्की मन्त्री बन्ने चर्चा थियो । तर, यसपटक पनि उनी परेनन् ।