पोखराको लामाचौरमा राष्ट्रिय महिला तथा पुरुष भलिबल प्रतियोगिता सुरु भएको छ । महिलातर्फ ११ औं संस्करण र पुरुषतर्फ तेस्रो संस्करणको प्रतियोगिता सुरू भएको हो।

नव आदर्श सामुदायिक विकास समाजले आयोजना प्रतियोगितामा महिलातर्फ सशस्त्र प्रहरी बलको एपीएफ क्लब र टिपटप न्यू डायमण्ड युथ स्पोर्ट क्बलले सुखद् सुरूवात गरेका छन् ।

मंगलबार सुरु प्रतियोगिताको उद्घाटन खेलमा गण्डकी भलिबल संघले कमजोर देखियो। अन्तिम समयमा निम्तो पाएको गण्डकीको टोलीमा यू–१९ खेलाडी समावेश छन् ।

विभागीय टोली सशस्त्र प्रहरी बलको एपीएफ क्बलसँग ३–१ को सेटमा गण्डकी पराजित भएको हो ।

दोस्रो खेलमा टिपटप न्यु डायमण्ड स्पोर्टस क्लबले एभरेष्ट भलिबल क्लबलाई ३–० को सोझो सेटमा पराजित गरेको छ ।

महिला तथा पुरुषतर्फ ४/४ टोलीको सहभागिता रहेको छ। प्रतियोगिताको फाइनल खेल २१ गते हुनेछ। राउण्ड रोबिनको आधारमा हुने प्रतियोगिताको विजेतालेसमान १ लाख ५० हजार १११ रुपैयाँ प्राप्त गर्नेछन्।

उपविजेताले १ लाख १११, तेस्रोले ५० हजार १११ रुपैयाँ नगदको साथमा सिल्ड, मेडल र प्रमाणपत्र प्राप्त गर्नेछन्। सर्वोत्कृष्ट खेलाडीसहित बेष्ट प्लेयर, बेस्ट क्विकर, बेस्ट लिव्रो, बेस्ट स्पाइकर, बेस्ट ब्लकर, बेस्ट सर्भर, बेस्ट डिफेन्डर र बेस्ट कोचले पनि विधागत पुरस्कार पाउनेछन्।

गत संस्करणको पुरुषतर्फको उपाधि घरेलु टिम गण्डकी प्रदेश भलिबल संघ र महिलातर्फको उपाधि डिफेन्डिङ च्याम्पियन नेपाल पुलिस क्लबले जितेको थियो।