पोखरा । चाडपर्वले बढेको हवाई चापलाई मध्येनजर गर्दै पोखरासहित मुख्य सुगम विमानस्थल भोलिदेखि बिहान ४ : ३० बजेदेखि खुला हुने भएका छन् । चाडपर्वसँगै गत शुक्रबार र शनिबार परेको अविरल वर्षाले बाढी र पहिरोको जोखिम बढेपछि हवाइ चाप बढेको हाे ।

नेपाल नागरिक उड्डयन प्राधिकरणका अनुसार यो नियम भोलि घटस्थापना अर्थात असोज १७ गतेदेखि कात्तिक १ गते पूर्णिमासम्म लागू हुनेछ । यो नियम अनुसार उपकरणको सहायताबाट उडान हुने पोखरा अन्तर्राष्ट्रिय विमानस्थल, त्रिभुवन अन्तर्राष्ट्रिय विमानस्थल, गौतम बुद्ध अन्तर्राष्ट्रिय विमानस्थल भद्रपुर, विराटनगर, जनकपुर, नेपालगञ्ज र धनगढी विमानस्थल रहेका छन् ।

पोखरा विमानस्थलका सूचना अधिकारी जसोदा रेग्मी सुवेदीले भोलि बिहान साढे ४ बजेदेखि नै विमानस्थल सञ्चाालनको तयारी भएको जानकारी दिइन् । अरु बेला विमानस्थलको जनशक्ति साढे ५ बजे आएर ६ बजे सञ्चालन गर्थौ,’ उनले भनिन्,‘ भोलिदेखि ४ बजे आएर साढे ४ बजे देखि नै विमानस्थल सञ्चालनको तयारी छ । ’

पोखरा विमानस्थल बिहान ६ बजेदेखि राति १२ बजेसम्म १८ घण्टा सञ्चालन हुँदै आएकोमा अब कात्तिक १ गतेसम्म साढे १३ घण्टा सञ्चालन हुनेछ । मंगलबार काठमाडौंबाट दुईतर्फी ३ सय ३५ वटा उडान भएका थिए भने यी उडानबाट १८ हजार १ सय ३७ यात्रुले यात्रा गरेका थिए ।