मातृशोकमा रहेका नेकपा (एमाले) का युवा नेता अर्जुन अधिकारीले  भेटी वापत संकलन भएको रकम आफू अध्ययन गरेको विद्यालय र स्थानीय मन्दिरलाई सहयोग गरेका छन् ।

नेता अधिकारीका आमा पोखरा १९, घार्मी निवासी दुर्गादेवी अधिकारीको १३ औं दिनको पुण्यतिथीका सन्दर्भ पारेर बुधबार भेटी वापत् संकलित रकम स्थानीय महेन्द्र माध्यमिक विद्यालयमा स्व. भरतराज–दुर्गादेवी स्मृति अक्षयकोष स्थापनार्थ ५ हजार ५ सय ५५ र ओमकारेश्वर महादेव मन्दिरलाई संचालन सहयोगार्थ ५ हजार ५ सय ५५ रुपैयाँ सहयोग गरिएको हो ।

१३ औं दिनको पुण्यतिथीमा आफ्ना स्वकीय सचिव अधिकारीको निवासमा गण्डकी प्रदेश प्रमुख डिल्लीराज भट्ट पुगेका थिए ।

उक्त अवसरमा प्रदेश प्रमुख भट्टले अक्षयकोषको रकम विद्यालयका अध्यक्ष बैकुण्ठ पौडेल र प्रधानाध्यापक बासुदेव पौडेल तथा मन्दिरका पुजारी रामचन्द्र पौडेल र मन्दिरका सदस्य लिला पौडेललाई रकम हस्तान्तरण गरे ।

साथै, मन्दिरमा दान संकलनका लागि दानपत्र बाकस पनि प्रदान गरे ।

एमाले गण्डकी प्रदेश कमिटिका सदस्यसमेत रहेका अधिकारीले बुवा आमाको स्मरणमा गरिएको यो कार्यले भौतिक शरीर साथमा नभएपनि सधैं बचाइरहने बताए ।