पोखरामा तेस्रो अन्तर्राष्ट्रिय पर्वतीय क्रस कन्ट्री दौड प्रतियोगिता हुने भएको छ । हिमालयन टुरिजम् फोरमले तिहार लगत्तै आगामी कार्तिक २२ देखि २५ गतेसम्म प्रतियोगिताको आयोजना गरेको हो । प्रतियोगितामा नेपालसहित छिमेकी मुलुक चीनका खेलाडी सहभागी हुनेछन् ।

प्रतियोगिता कार्तिक २४ र २५ गते सञ्चालन हुनेछ । जसका लागि २२ गते खेलाडी पोखरा आइपुग्नुपर्नेछ भने २३ गते खेलाडीको दर्ता र उनीहरुको लागि आवश्यक सामाग्री वितरण गरिनेछ ।

२४ गते बिहान साढे ८ बजे खेलको उद्घाटन गर्ने तयारी रहेको प्रतियोगिताका मिडिया संयोजक प्रतिकराज पहारीले जानकारी दिए । उनका अनुसार दौड, साइकलिङ र बोटिङ गरी ५० किलोमिटरको दुरी पार गर्नुपर्ने हुन्छ । प्रतियोगिता सफल बनाउनका लागि १५ वटा उपसमिति गठन गरिएको छ ।

यस खेलको अवसरमा पोखरा र यस क्षेत्रको पर्यटन प्रवर्धन साथै पोखरा अन्तर्राष्ट्रिय विमानस्थलको सञ्चालनमासमेत सहयोग पुग्ने आयोजकको अपेक्षा छ । नेपाल–चीन बीचको सम्बन्धलाई थप सुदृढ बनाउँदै लैजाने विश्वास गरिएको संस्थाका अध्यक्ष विश्वशंकर पालिखेले जानकारी दिए ।

प्रतियोगितामा १ करोड ३६ लाख खर्च रुपैयाा खर्च हुने अनुमान आयोजक टीमको छ ।

चिनियाँ खेलाडीको लागि २२ गते कुनमिङबाट पोखरासम्म अन्तर्राष्ट्रिय चार्टर उडानको व्यवस्था गरिएको छ । काठमाडौँ तथा नेपालका विभिन्न ठाउँबाट आउने प्रतियोगीहरुका लागि आयोजकले यातायातको व्यवस्था गर्ने जनाएको छ ।

प्रतियोगीहरूले टिम समूह, च्यालेन्ज इण्डिभिजुअल समूह, विद्यार्थी दौड र ह्याप्पी रन समूह (जुनसुकै समूह) मा सहभागिता जनाउन सक्नेछ । टिम समूहमा ३० वटा मिश्रित टिम रहने छन् । यसमा कम्तीमा एक विपरीत लिंगको सदस्य समेटिएको हुनुपर्नेछ ।

९० जना खेलाडीमध्ये १० चिनियाँ र २० नेपाली टोली हुनेछ । खेलाडीले ५० किलोमिटरको दूरीमा ट्रेल रनिंग, साइकलिङ र रोइङ गर्नुपर्ने हुन्छ । दौडका क्रममा खेलाडीले कुल २२५८ मिटर उचाइ पार गर्नेछन् । विदेशी नागरिकका लागि दर्ता शुल्क प्रतिटिम २२,९२० रुपैँया रहेको आयोजकले पत्रकार सम्मेलन मार्फत् जनाएको छ ।

यसैगरी, च्यालेन्ज इण्डिभिजुअल समूहमा करिब २ सय खेलाडी सहभागी हुने छन् । जसमा ८० चिनियाँ र १२० नेपाली रहनेछन् । ५० किलोमिटरको ट्रेलमा २३६६ मिटरको कुल उचाइ पार गर्नेछन् । गेममा सहभागी हुने विदेशी खेलाडी खेलाडीका लागि प्रतिव्यक्ति ९९५० रुपैयाँ दर्ता शुल्क लाग्नेछ ।

विद्यार्थी दौड विद्यार्थीहरुका लागि आयोजित गेम हो । ५ सय खेलाडी सहभागी हुने यस गेमका लागि बाराहीचोकदेखि ड्यामसाइसम्म २ किलोमिटर दुरी पार गर्नुपर्ने हुन्छ । ह्याप्पी रन समूहमा ४८० नेपाली र २० चिनियाँ गरी ५ सय खेलाडी सहभागी हुने अपेक्षा आयोजकको छ ।

२ किलोमिटरको दुरी पार गर्नुपर्ने यस दौड प्रतियोगितामा समाप्ती समय २ घण्टाको रहनेछ । यसमा सहभागी हुने विदेशी खेलाडीको लागि १९९० अर्थात १०० आरएमबी शुल्क तोकिएको छ ।

पहिलो समूहमा प्रथम हुनेका लागि ४ लाख ५८ हजार ४ सय रुपैया अर्थात् २४ हजार आरएमबी पुरस्कार तोकिएको छ । यस्तै, दोस्रो हुनेको लागि ३ लाख ४३ हजार ८ सय अर्थात् १८ हजार आरएमबी र तेस्रो हुनेको लागि २ लाख २९ हजार २ सय अर्थात् १२ हजार आरएमबी राशी पुरस्कार तोकिएको छ ।

यस्तै, चौथो हुनेका लागि १ लाख ५२ हजार ८ सय अर्थात् ८ हजार आरएमबी र पाँचौ हुनेका लागि ९५ हजार ५ सय अर्थात् ५ हजार आरएमबी नगर पुरस्कारको व्यवस्था गरिएको आयोजक समितिले जनाएको छ । उनीहरुले मेडल र प्रमाणपत्र पनि पाउनेछन् ।

यसैगरी च्यालेन्स समूहमा शीर्ष १० पुरुष तथा महिलाले नगद, मेडल र प्रमाणपत्र पाउनेछन् । प्रथमका लागि १ लाख ५२ हजार ८ सय अर्थात् ८ हजार आरएमबी, दोस्रोका लागि १ लाख १४ हजार ६ सय अर्थात् ६ हजार आरएमबी र तेस्रो हुने खेलाडीले ७६ हजार ४ सय अर्थात २ हजार आरएमबी प्राप्त गर्नेछन् ।

चौथोदेखि सातौँ हुने खेलाडीले ३८ हजार २ सय अर्थात् २ हजार आरएमबी र आठौँदेखि दशौँ स्थान प्राप्त गर्ने खेलाडीको लागि १९ हजार १ सय अर्थात् १ हजार आरएमबी पुरस्कारको व्यवस्था गरिएको छ ।

विद्यार्थी दौडमा शीर्ष ६ (महिला/पुरुष दुवै) खेलाडीको लागि नगद, मेडल र प्रमाणपत्रको व्यवस्था गरिएको छ । प्रथम हुनेका लागि ३० हजार, दोस्रोका लागि २५ र तेस्रोका लागि २० हजार रुपैया पुरस्कार राशी रहेको छ ।

चौथोदेखि छैठौँ हुने खेलाडीले १०/१० हजार रुपैयाा पाउनेछन् । यस्तै, ह्याप्पी रनमा सहभागी हुने खेलाडीले प्रमाणपत्र मात्र प्राप्त गर्नेछन् ।

प्रतियोगिता लेकसाइडको बाराहीघाटबाट सुरु हुन्छ । छोरेपाट हुादै फुस्रेखोला, रामदी, मट्टीखान, स्याङ्जाको फेदीखोला, रामकोट कविन्डे हुादै पुम्दीभुम्दी, विश्व स्तुपा, फेवाताल, खपौदी हुादै पुन बाराहीघाटमा नै आउनेछन् । फेवातालमा बोटिङ प्रयोग गर्नेछन् भने, रामदी तथा मट्टीखानमा साइकल प्रयोग गर्नेछन् । यसरी ५० किलोमिटरको दुरी तय गरिएको छ ।

चिनियाँ राजदुतावास, नेपाल सरकार, नेपाल पर्यटन बोर्ड, गण्डकी सरकार र पोखरा महानगरको आर्थिक सहयोग रहने आयोजकले जनाएको छ ।

पर्यटकीय राजधानी पोखरामा संचालन गरिने यस्ता इभेन्टलाई व्यवसायीक रुपमा सफल गराउनुपर्ने संस्थाका उपाध्यक्ष पोमनारायण श्रेष्ठले बताए । श्रेष्ठका अनुसार प्रतियोगितामा सहकार्यका लागि बुद्ध एयरलाइन्स, कुनमिङ तियान्या इन्टरनेसनल ट्राभल एजेन्सी, युन्नान छाड्‌ङ्ग्री टेक्नोलोजी, नेपाल दर्शन टुर्स कम्पनी जस्ता संस्था रहने छन् ।