पोखरा । दसैँको टीकाको दिन पोखरा महानगरपालिकाका मुख्य रुटहरूमा निःशुल्क सार्वजनिक यातायात सञ्चालन हुने भएको छ। पोखरा महानगरपालिका, स्थानीय प्रशासन र यातायात व्यवसायीहरूको सहकार्यमा महानगर क्षेत्रका विभिन्न ८ वटा रुटहरूमा १८ वटा निःशुल्क बस सेवा सञ्चालन गर्न लागिएको प्रमुख जिल्ला अधिकारी भरतमणी पाण्डेले जानकारी दिए ।

जिल्ला प्रशासन कार्यालय कास्कीमा बुधबार आयोजित पत्रकार सम्मेलनमा प्रजिअ अधिकारीले दसैंको दिन बिहान ७ बजेदेखि बेलुकी ४ बजेसम्म कोत्रे–पृथ्वीचोक–चिप्लेढुङ्गा–बाग्लुङ् बसपार्क, फेदी–हेमजा–हरिचोक–पृथ्वीचोक,लामाचौर–बगर–महेन्द्रपूल–चिप्लेढुङ्गा–सृजनाचोक–बिरौटा–छोरेपाटन, महेन्द्रगुफा–बगर–महेन्द्रपूल–चिप्लेढुङ्गा–सृजनाचोक–बिरौटा–छोरेपाटन, महेन्द्रगुफा–बगर–महेन्द्रपूल–पृथ्वीचोक–बिरौटा–सहिदचोक–लेकसाइड, राजाकोचौतारा–रुपाताल–सातमुहाने–खुदी–तालचोक–पृथ्वीचोक–बाग्लुङ् बसपार्क, काँहुखोला–महेन्द्रपूल–पृथ्वीचोक–जिरो कि.मी–हल्लनचोक, वेगनासताला–तालचोक–पृथ्वीचोक–चिप्लेढुङ्गा–बाग्लुङ् बसपार्क रुटमा निःशुल्क बस सेवा सञ्चालन गर्न लागिएको हो ।

यातायात व्यवसायीकाे अग्रसरतामा निशुल्क बस सञ्चालन गर्न लागिएको र यसका लागि आफूहरुले सहजीकरण मात्रै गरिदिएको प्रजिअ पाण्डेको भनाइ थियो ।

पोखरा यातायात प्रालि, स्थानीय यातायात प्रालि, पृथ्वी राजमार्ग बस सञ्चालक कम्पनी, वेगनासताल पोखरा यातायात प्रालिले तोकिएका रुटहरूमा निशुल्क सेवा प्रदान गर्नेछन् । यसका लागि पोखरा महानगरपालिकाले चालक र सहचालकलाई भत्ता उपलब्ध गराउने छ । पहिला बसलाई इन्धन उपलब्ध गराउने भनिए पनि धेरै बस हुने भएकाले भत्तामात्र उपलब्ध गराउन लागिएकाे पोखरा १६ का वडाध्यक्ष अमृत तिमिल्सिनाले बताए ।

यातायात व्यवसायी केदार पौडेलले सामाजिक उत्तरदायित्व अन्तरगत आफूहरुले दसैंका दिन बस सञ्चालन गर्न लागिएकाे बताए । अर्का व्यवसायी योगेन्द्र केसीले पहिलोपटक निशुल्क बस सञ्चालन गर्न लागिएकाले यो आफूहरुका लागि पनि सिकाइ बन्ने बताए । पोखरेली ट्याक्सी व्यवसायी समितिले यसका लागि १ सय ५० लिटर डिजेल उपलब्ध गराउने सो समितिका शोभाकान्त पोखरेलले बताए ।