साफ महिला च्याम्पियनसिपको फाइनल खेलमा बंगलादेशसँग हारेपछि नेपाली टोलीका प्रशिक्षक राजेन्द्र तामाङले राजीनामा दिने घोषणा गरेका छन्।

साफ महिला च्याम्पियनसिपको उपाधि दिलाउन नसकेकोमा त्यस्को जिम्मेवारी लिँदै उनले प्रशिक्षकबाट राजीनामा दिने घोषणा गरेका हुन्।

बुधबार घरेलु मैदान दशरथ रंगशालामा भएको साफ महिला च्याम्पियनसिपको फाइनलमा नेपालले बंगलादेशसँग २-१ गोल अन्तरको हार ब्यहोरेको थियो।

उनले अब राष्ट्रिय टोलीसँग काम नगर्ने र क्लब फुटबलमा नै जाने जानकारी दिए।

अखिल नेपाल फुटबल संघ (एन्फा) ले २०८० माघ १० मा तामाङलाई नेपाली राष्ट्रिय महिला फुटबल टोलीको मुख्य प्रशिक्षकमा नियुक्त गरेको थियो। त्यसअघि उनले थ्री स्टार क्लब, नेपाल एपीएफ क्लब र मनाङ मर्स्याङ्दी क्लब सम्हालेका थिए।

तामाङले साउदी अरबमा हुने वाफ महिला च्याम्पियनसिपमा पनि नेपाली टोली सम्हालेका थिए। उक्त प्रतियोगितामा पनि नेपाल फाइनलमै पराजित भएको थियो। जोर्डनले नेपाली टोलीमाथि विजय प्राप्त गरेको थियो।

साफ महिला च्याम्पियनसिपको फाइनलमा नेपालको यो छैटौँ हार हो भने समग्र अन्तर्राष्ट्रिय प्रतियोगिताहरूमा सन् २०१० यता नेपाली राष्ट्रिय महिला टोलीको १२ औँ हार हो।