पोखरा । गण्डकी प्रदेशमा पनि सरकार सञ्चालनका लागि सत्तारुढ दल नेपाली कांग्रेस र नेकपा एमालेको राजनीतिक संयन्त्र निर्माण भएको छ ।

मंगलबार कांग्रेसको गण्डकी प्रदेश कार्यालयमा बसेको बैठकले सभापति शुक्रराज शर्माको संयोजनमा समिति बनाउँदै ७ बुँदे निर्णय गरेको हो ।

संयन्त्रमा कांग्रेस र एमालेका तर्फबाट ३/३ जना रहने छन् । संयन्त्रको संयोजन आलोपालो गर्ने र बैठक व्यवस्थापन गर्नेले नै अध्यक्षता गर्ने निर्णय भएको छ ।

कांग्रेसका तर्फबाट प्रदेश सभापति शर्मा, कांग्रेस संसदीय दलका नेता तथा मुख्यमन्त्री सुरेन्द्रराज पाण्डे र प्रदेश समितिका महामन्त्री विष्णु लामिछाने छन् ।

एमालेका तर्फबाट स्थायी कमिटी सदस्य तथा गण्डकी प्रदेश इन्चार्ज किरण गुरुङ, संसदीय दलका नेता खगराज अधिकारी र गण्डकी कमिटी अध्यक्ष नवराज शर्मा छन् ।

बैठकले गण्डकी प्रदेशभित्रका सबै जिल्लामा केन्द्रको निर्देशन अनुसार संयन्त्र निर्माण गरी काम गर्न निर्देशन दिने निर्णय गरेको किरण गुरुङले जानकारी दिए ।

दुई पार्टीबीचको सहकार्यको आवश्यकतालाई जनसमक्ष पुर्‍याउन र संयुक्त सरकारले गरेका काम तथा योजनाको पक्षमा जनमत निर्माण गर्न, सरकारले गरेका कामको समीक्षा गर्दै सरकारलाई सुझाव दिने, सहयोग गर्ने र सकारात्मक कामको प्रचार–प्रसार गर्ने काम संयन्त्रले गर्ने छ ।

नेपाली कांग्रेस र नेकपा एमालेबीच स्थानीय तहमा कतै विवाद भए दुई दल बसी तत्काल समस्याको समाधान गर्न निर्देशन दिने निर्णय पनि बैठकले गरेको छ ।

अराजनीतिक गतिविधिहरुलाई समयमा नै नियन्त्रण गर्न नेपाल सरकारलाई अनुरोध गर्ने र कानुनी राज्यको कार्यान्यवयनको लागि आवश्यक सहयोग गर्न सबै पक्षलाई अपिल गर्ने निर्णय पनि गरेको विज्ञप्तिमा उल्लेख छ ।

गण्डकी प्रदेशका विकास निर्माणका कामका विषयमा दुई दलीय साझा धारणासहित अगाडि बढ्ने निर्णय बैठकले गरेको छ । आगामी बैठक नेकपा एमालेको संयोजनमा गण्डकी प्रदेश कार्यालयमा हुने भएको छ ।