नेपालले यूएईमा जारी यू-१९ महिला विश्वकप टी-२० क्रिकेटको एसिया छनोट खेलमा कुवेतमाथि कीर्तिमानी जित हासिल गरेको छ । मंगलबार सम्पन्न खेलमा नेपालले कुवेतलाई एक सय ६५ रनको फराकिलो अन्तरले हराएको हो ।

नेपालका लागि यो फराकिलो अन्तरको कीर्तिमान हो । नेपालले दिएको दुइ सय १४ रनको लक्ष्य पछ्याएको कुवेत १३ ओभरमा ४८ रन बनाउँदै अल आउट भएपछि नेपाल एक सय ६५ रनले विजयी भएको हो ।

नेपालका लागि कप्तान पूजा महतोले कीर्तिमानी आठ रन खर्चेर पाँच विकेट लिइन् । उनी एकै खेलमा पाँच विकेट लिने र शतक बनाउने पहिलो खेलाडीसमेत बनेकी छन् ।

यसअघि टस जितेर पहिले ब्याटिंग गरेको नेपालले कप्तान पूजा महतोको शानदार कीर्तिमानी शतकको मद्दतले २० ओभरमा दुइ विकेट गुमाउँदै दुइ सय १३ रन बनाएको थियो ।

५७ बलमा शतक पूरा गरेकी पूजाले ६९ बलमा अविजित रहँदै एक सय ३० रन बनाइन् । त्यस्तै उपकप्तान सोनी पाख्रिनले अविजित रहँदै ३३ बलमा ४३ रन बनाएकी थिइन् । दुवैबीच तेस्रो विकेटका लागि कीर्तिमान एक सय ५७ रनको साझेदारी भएको छ ।

यो यस प्रतियोगितामा कुनै पनि देशले बनाएको सर्वाधिक ठूलो स्कोर हो । त्यस्तै पूजाको यो अहिलेसम्मकै सर्वाधिक रन हो ।

यसअघि यूएईले कुवेत विरुद्ध नै दुइ सय ११ रन बनाएको थियो । यसअघि प्रतियोगिताको सर्वाधिक व्यक्तिगत स्कोरमा गत आइतबार यूएईकी लाभन्या केन्याले कुवेतविरुद्ध ९९ रन बनाएकी थिइन् ।

यो जितसँगै नेपालले शीर्ष स्थानमा रहेर विश्वकपमा छानिने आशा जीवितै राखेको छ । यसअघिको पहिलो खेलमा नेपाललाई पराजित गरेको यूएईको नेट रन रेट निकै राम्रो भएका कारण नेपालले कुवेतलाई त सोचेजस्तै हरायो । अब अन्तिम खेलमा यूएईविरुद्धको खेल पनि फराकिलो अन्तरले जित्नुपर्ने हुन्छ ।

सामान्य जितलेमात्र नेपालले यूएईलाई पछि पारेर शीर्ष स्थानमा रहने अवस्था रहँदैन । प्रतियोगितामा नेपालले पाँच खेलमा ४३ जित र एक हार बेहोरेको छ । अंक तालिकामा नेपाल दोस्रो स्थानमा छ । नेपालले यसअघि कुवेतलाई एक सय आठ रनले पराजित गरेको थियो ।

नेपालले यस प्रतियोगितामा बिहीबार यूएईसँग खेल्ने तालिका छ । छनोट प्रतियोगिता नेपाल र कुवेतसँगै आयोजक यूएई र थाइल्याण्ड सहभागी छन् ।

डबल राउण्ड रोविनका आधारमा खेलाइएको यस प्रतियोगितामा शीर्ष स्थानमा रहने टोली अर्को वर्ष मलेसियामा हुने यू-१९ महिला टी-२० विश्वकपमा छनोट हुनेछ ।