लमजुङ । दूधपोखरी गाउँपालिकामा सुत्केरी व्यथा लागेको २० घण्टापछि एक प्रसव पीडामा रहेकी महिलालाई हेलिकप्टरमार्फत उद्धार गरिएको छ ।

दूधपोखरी वडा नं. १, कल्लाबारीकी २७ वर्षिया प्रीतिमाया गुरुङलाई हेलिकप्टरमार्फत उद्धार गरेर पोखरा ल्याइएको हो ।

बिचौर स्वास्थ्य चौकीका अनमी सविना मरहट्टाले बुधबार अपरान्ह ४ बजेतिर गुरुङलाई हेलिकप्टरमार्फत उद्दार गरेर पोखरास्थित पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पताल लगिएको बताइन् ।

गण्डकी प्रदेश स्वास्थ्य मन्त्रालयको पहलमा सिम्रिक एअरको हेलिकप्टर मार्फत पोखरा ल्याइएको हो । स्वास्थ्यमन्त्री कृष्णप्रसाद पाठकका अनुसार प्रदेशमा सहज रूपमा बच्चा जन्माउन नसकेर पीडामा रहेका गर्भवतीलाई तत्काल बाहिर लैजानुपर्ने भएमा मन्त्रालयबाटै हेलिकप्टर उपलब्ध गराउँदै आएको छ ।

पश्चिमाञ्चल क्षेत्रीय अस्पताल पोखरा ल्याई गुरुङको शल्यक्रिया गरी छोरी जन्मिएको छ । हाल चिकित्सकको निगरानीमा रहेका सुत्केरी र शिशुको स्वास्थ्य अवस्था सामान्य रहेको छ ।

गुरुङलाई मंगलबार साँझ ८ बजेतिरबाट सुत्केरी व्यथा लागेको र राती ३ बजे बिचौर स्वास्थ्य चौकीमा ल्याइएको अनमी मरहट्टाले जानकारी दिइन् ।

‘गुरुङको स्वास्थ्यवस्था सामान्य थियो । आज (बुधबार) बिहान ९ बजे पुरै घर खुलेको थियो । तैपनि सुत्केरी हुन सकेको थिएन’ उनले भनिन्, ‘पछि सुत्केरी हुन असहज हुन सक्ने अवस्था देखेर हामीले रिफर गरेका हौं ।’

त्यसपछि हेलिकप्टरका लागि पहल गरिएको र हेलिकप्टरमार्फत प्रसव पीडामा रहेकी महिलालाई सुविधायुक्त अस्पतालमा लैजान सफल भएको उनले बताइन् ।

दूधपोखरी गाउँपालिका वडा नं. १ का अध्यक्ष दुर्गामान गुरुङले महिला सुत्केरी हुन नसकेपछि गण्डकी प्रदेश सरकारसंग आग्रह गरेर महिलालाई हेलिकप्टरमार्फत उद्दार गरिएको बताए ।