पोखरा । विवादित व्यक्तिको अगुवाईमा पोखरामा कोटीहोम हुन नदिने अडानमा रहेको पोखरा महानगर र जुनै हालतमा पनि तीन महिने कोटीहोम गर्ने अड्डी कसेको मानव सेवा फाउण्डेशन अन्ततः दुवै पक्ष एक कदम पछाडि हटेका छन् ।

कोटी होम गर्न दिन पोखरा महानगर तयार बनेको छ भने लेकसाइडको बाराहीघाटमै कोटीहोम गर्ने अडानमा रहेको मानव सेवा फाउण्डेशन पनि स्थान परिवर्तन गरेरै भएपनि कोटीहोम गर्न तयार बनेको हो ।

सोमबार महानगरपालिकामा बसेको विभिन्न पक्षको बैठकले कोटिहोम गर्न दिने तर स्थान हेरफेरका लागि समिति नै बनाउने सहमति गरेको हो ।

जिल्ला प्रशासन कार्यालय, कास्कीका प्रतिनिधिको रोहबरमा महानगरपालिका, तीनवटै सुरक्षा निकाय र आयोजक मानवसेवा फाउन्डेसनका प्रतिनिधीबीच वार्ता भएको थियो ।

कोटिहोममा महानगरपालिकाले पनि अपनत्व लिने निर्णय गरेको भन्दै विश्वहिन्दु महासंघका उपाध्यक्ष शंकर खरालले अब कोटीहोम सबै पक्षको रहेको प्रतिक्रिया दिए ।

स्थानका विषयमा देखिएको विवाद टुंग्याउन मंगलबार कार्यपालिका बैठक बस्ने निर्णय भएको छ । कार्यपालिका बैठक बसेर पाँच सदस्यीय विवाद समाधान समिति बनाउने र सो समितिको सिफारिस बमोजिम आयोजना स्थल टुंगो लगाइने भएको हो ।

समितिमा आयोजकका तर्फबाट दुई जना, महानगरबाट दुई जना र जिल्ला प्रशासनबाट एक जना रहनेछन् । समितिले स्थानको टुंगो यही हप्ताभित्र लगाउने बताइन्छ ।

धर्मगुरु विजय कृष्णमूर्तिजी महाराज भन्दै आफूलाई चिनाउने विजय भण्डारीमाथि झण्डै डेढ दशकदेखि धार्मिक क्रियाकलापको आवरणमा ठगी गर्दै आएको आरोप छ । उनी पटक पटक गरी तीन वर्ष बढी जेल पनि पुगिसकेका व्यक्ति हुन् ।

पशुपति कोटीहोम आयोजना गरेर समापनका समयमा विवादित बनेका उनको मानव सेवा फाउण्डेशनले पोखरामा कोटीहोमका लागि भन्दै चौताराका पूराना रुख काटेको आरोपमा सुरुबाटै यो महायज्ञ विवादित बनेको छ । भूमिपूजनका बेला गत शुक्रबार बाराहीघाटमा पोखरा महानगर प्रहरी र कोटीहोम आयोजकपक्षबीच झडप हुँदा दर्जन बढी घाइते भएका थिए ।

धार्मिक सद्भाव खल्बलिने र महायज्ञको नाममा धर्मको लडाईं हुने भय अब यो सहमतिसँगै मत्थर हुने अपेक्षा गरिएको छ ।