पोखरा । नेकपा (एमाले) गण्डकी प्रदेश कमिटीको कार्यालय सचिवको जिम्मेवारी तनहुँका रमाकान्त (आर.के) पोख्रेलले पाएका छन् ।

एमाले गण्डकी प्रदेश कमिटी अध्यक्ष नवराज शर्माले शुक्रबार पोख्रेललाई मनोनयनपत्र हस्तान्तरण गरेका हुन् ।

तनहुँको घिरिङ गाउँपालिका–१ का पोख्रेलले शुक्रबारदेखि नै उक्त जिम्मेवारी सम्हालेका छन् ।

गत फागुन २० गते बसेको सचिवालय चौथो पूर्ण बैठकले पोख्रेललाई प्रदेश कमिटीको कार्यालय सचिवको जिम्मेवारी दिने निर्णय गरेको थियो ।

आर.के अनेरास्ववियुको स्कुल प्रारम्भिक कमिटी सदस्य, तनहुँ जिल्ला सदस्य, सचिवालय सदस्य, सचिव हुँदै अध्यक्ष भएका थिए । उनी संगठनको केन्द्रीय सदस्य, केन्द्रीय सचिवालय सदस्य, गण्डकी प्रदेश कमिटी सचिव र संयोजक पनि भए । उनी नेकपा (एमाले)जिल्ला कमिटी तनहुँको सदस्य पनि भइसकेका छन् ।

२०७४ सालको निर्वाचनपछि तनहुँका किरण गुरुङ गण्डकी प्रदेशको अर्थमन्त्री हुँदा रमाकान्त स्वकीय सचिव थिए ।