पोखरा । कास्कीको अन्नपूर्णमा गएको आइतबार चट्याङ लागेर मृत्यु भएका दुई मजदुरको परिवारलाई बीमा रकमसहित विशेष क्षतिपूर्तिको माग गरिएको छ ।

किरात अध्ययन तथा अनुसन्धान केन्द्र, नेपाल किरात कुलुङ संघ, कास्की, किरात सेवा समाज, पोखरा–कास्की र पूर्वाञ्चल सेवा समाजले मंगलबार संयुक्त रुपमा अपिल सार्वजनिक गरेको हो ।

संयुक्त अपिल मार्फत मृतक मजदुरहरुका परिवारलाई बीमा रकमसहित विशेष क्षतिपूर्तिका माग गरिएको छ । साथै मृतकहरुको शव उनीहरुको स्थायी ठेगानासम्म पुर्याउन आवश्यक सम्पूर्ण आर्थिक व्यवस्थापन गर्न पनि अपिल गरिएको छ ।

उनीहरुको मृत्यु निर्माण कार्यकै सिलसिलामा भएकोले सम्बधित निकायहरुले उक्त मागहरु तत्काल सम्बोधन गर्नुपर्ने बताइएको छ ।

उक्त परियोजना अन्नपूर्ण गाउँपालिका– ११ को जिम्मेवारीमा सञ्चालनमा रहेको छ ।

गएको आइतबार दिउँसो अन्नपूर्णमा चट्याङ लागेर पदमार्ग निर्माण कार्यमा खटिएका संखुवासभाको सिलीचोङ गाउँपालिका– २ का ४६ वर्षीय भरतकुविर राई र १५ वर्षीय महेश राईको मृत्यु भएको थियो ।

सम्बधित न्यूजः कास्कीको अन्नपूर्णमा चट्याङ लागेर दुई जनाको मृत्यु