पोखरा । पोखरामा सुनका गहना तथा नगद चोरी गर्ने २ जना पक्राउ परेका छन् ।

पक्राउ पर्नेमा म्याग्दी स्थायी घर भई हाल पोखरा महानगरपालिका– ३ बस्ने वर्ष २२ को अमृत नेपाली र धादिङ स्थायी वतन भई हाल पोखरा ३ मै बस्ने वर्ष ३४ को बिनोद नेपाली रहेका छन् ।

मंगलबार राति पोखरा ३ मोहरिया टोल स्थितमा २ वटा घर/कोठामा सुनका गरगहना तिलहरी– १ थान, सुनको औंठी– १ थान चन्द्रमा– १ थान र नगद रु.३ हजारसमेत चोरी भएको भन्ने सूचनाको आधारमा वडा प्रहरी कार्यालय बगर कास्कीबाट खटिई गएको प्रहरी टोलिले उनीहरुलाई पक्राउ गरेको हो ।

प्रहरीले अमृतको घरकोठाबाट चोरी भएको सुनको तिलहरी– १ थान, चन्द्रमा– १ थान, चाँदीको चेन– १ थान र नगद रु.२ हजासमेत बरामद गरेको छ ।

उनीहरुलाई कास्की जिल्ला अदालतबाट चोरी तथा डाँका सम्बन्धी कसूरमा ७ दिन म्याद थप गरी अनुसन्धान प्रकृया अगाडी बढाइएको प्रहरीले जनाएको छ ।