पोखरा–५, पर्स्याङस्थित वीरेन्द्र मेमोरियल अङ्ग्रेजी माध्यमिक विद्यालयमा विश्व वातावरण दिवसका अवसरमा एकदिवसीय वातावरणीय सचेतना कार्यक्रम सम्पन्न भएको छ ।

उक्त कार्यक्रम दुई चरणमा सम्पन्न भएको थियो । कार्यक्रमको पहिलो चरणमा विद्यालय परिसरमा सरसफाइ अभियान सञ्चालन गरिएको थियो ।

दोस्रो चरणमा विद्यालयका कक्षा पाँच देखि कक्षा दशसम्मका विद्यार्थीहरुले विद्यालय परिसरदेखि पोखरा बाग्लुङ राजमार्गसम्मको सडक, चिल्ड्रेन पार्क, राधाकृष्ण मन्दिर वरपरको सरसफाई गरेका थिए ।

विद्यालयमा नर्सरी देखि कक्षा तीनसम्म कक्षागत चित्रमा रङ भर्ने प्रतियोगिता सम्पन्न भएको थियो । साथै, कक्षा चारदेखि कक्षा दशसम्मका विद्यार्थीहरुमा “वातावरण संरक्षण” शीर्षकमा कवितालेखन प्रतियोगिता पनि सम्पन्न भएको थियो ।

उक्त कार्यक्रममा विद्यालयका निर्देशक, प्रधानाध्यापक, शिक्षक, कर्मचारी, विद्यार्थीहरू तथा स्थानीयको पनि सक्रिय सहभागिता रहेको थियो।