पोखरा । कास्कीमा रहेका १० वटा निजी विद्यालयको क्लस्टरका रुपमा स्थापित स्कोप कास्कीले आधारभूत तह स्तरीय शब्दखेल प्रतियोगिता सम्पन्न गरेको छ ।

प्रतियोगितामा डिज्नील्याण्ड एकेडेमी प्रथम, शान्ति निकेतन द्वितीय, ज्ञानुबाबा आवासीय माध्यमिक विद्यालय तृतीय र ज्ञानगङ्गा विद्यापिठ सान्त्वना स्थान हात पारेका छन् ।

कार्यक्रममा बोल्दै प्रा। डा। कुसुमाकर न्यौपानेले प्रतियोगिताले विद्यार्थीमा भाषामा शुद्धता आउने बताए । उनले बिग्रिँदै गएको भाषालाई शुद्धिकरण गर्दै जानुपर्ने समय आएको बताउर्दे यस्ता कार्यक्रमले विद्यार्थीहरूमा भाषाप्रतिको माया बढ्दै जाने बताए । छोटो समयमा नै स्कोप, कास्कीमा आवद्ध विद्यालयहरूले माध्यमिक शिक्षा परीषाको नजितामा कास्की मात्र नभई देशभर नेपाल अब्बल सावित गरेकोमा बधाई दिए ।

प्रतियोगिताका संयोजक स्कोप, कास्कीका कोषाध्यक्ष तथा डिज्नील्याण्ड एकेडेमीका संस्थापक/प्राचार्य नरेशप्रसाद बरालले विद्यार्थीमा नेपाली भाषा प्रयोगका लागि थप ऊर्जा प्राप्त भएको बताए ।

स्कोप, कास्कीका अध्यक्ष डा. महेश्वर पराजुलीले भाषा सम्बन्धी कार्यक्रमले विद्यार्थीहरूबाट समेत केही सिक्ने अवसर प्राप्त भएको बताए ।

प्रतियोगितामा डिज्नील्याण्ड एकेडेमीका नेपाली विभागीय प्रमुख हरिप्रसाद शर्माले निर्णायक रहेका थिए । संस्थाका उपाध्यक्ष दुर्गाबहादुर थापाले स्वागत मन्तव्य राखेका कार्यक्रमको संचालन सचिव दिपक शाहले गरेका थिए ।