सिन्धुलीबाट थातथलो छोडेर सुटुक्कै पोखरा आइपुगेको हायू परिवार सिन्धुली फर्कन अस्वीकार गरेको छ।

सिन्धुलीको गोलञ्जोर ६ का मा रहेको घरमा ताला ठोकेर नफर्कने गरी आइपोखरा पुगेका उनीहरूलाई फर्काउन वडाध्यक्ष रविन कुमार श्रेष्‍ठ पोखरा आइपुगेका थिए । वडाध्यक्षसँग हायू परिवारले घर फर्कन अस्वीकार गरेको हो।

उनीहरूले यो विषयमा सोच्नको लागि दुई-तीन दिनको समय मागेका छन् ।अध्यक्ष श्रेष्‍ठ भने हायू परिवार नलिई पोखराबाट सिन्धुली फर्कंदै छन्।

उनले उक्त परिवार फर्किए तत्कालका लागि अस्थायी टहरा र पछि पक्की घरसमेत बनाइदिने आश्वासन दिएका छन्।

गएको शुक्रबार १६ जनाको परिवार घरमा नभेटिएपछि हल्लाखल्ला भएको थियो। उनीहरू कामको खोजीमा पोखरा आइपुगेको सोमबार पत्ता लागेको थियो। पोखरा गगनगौंडामा भेटिएका उर्मिला हायूका परिवारले पोखरा फेवातालबाट डुंगा शयर गरी बाराही मन्दिर दर्शन पनि गरे ।

अहिले उनीहरू ज्वाइँ धनबहादुर तामाङको जिम्मामा छन् । गाउँमा छोराछोरी बिरामी परिरहने र घर पनि दुर्गममा भएको भन्दै थातथलो छोडेको उनीहरूले बताएका छन्।

घर छोडेर हिँड्नुको कारण सोद्धा परिवार बिरामी भइरहने, तर्साएको जस्तो लाग्ने, धामीले पनि नबस्न भनेको भन्ने गरेका छन् ।

केही सञ्चारमाध्यममा भने उनीहरूले निकै गम्भीर रहस्य खोलेका छन् । तर स्पष्ट भन्न सकेनन् । घरमुली उर्मिला हायूले आफ्ना पति पनि ३ वर्ष अघि भत्ता बुझेर फर्कँदा बेपत्ता भएको र पछि जंगलमा कंकाल भेटिएको बताएकी छन् ।

आफ्नो घरमा आगो लागेको सुनेको भन्दै उनले थपेकी छन् – ‘तपाईंहरु बुझ्नुस् न, आगो लगाएको छ रे, किन लगायो ? हामी त्यहाँ भएको भए हाँडखोर मात्र भेटिन्थ्यो कि ?’ यसको अर्थ उनीहरु त्यहाँ असुरक्षित छन् भन्ने अर्थ लाग्छ ।

भिडियो अन्तर्वातामा यसो भनेपनि यसबारेमा थप स्पष्ट भने पारेका छैनन् । भिडियोमै यसबारे खुलस्त भन्न डराएका छन् ।

सम्बन्धित समाचारः

सिन्धुलीका हायू परिवारको पोखरा घुमफिरः फेवातालमा डुंगा चढे, बाराही दर्शन गरे

हायू समाजले भन्योः आधारहिन प्रचारले सिन्धुलीकाे परिवारलाई अनावश्यक हैरानी दियो

सिन्धुलीबाट बेपत्ता परिवारका सबै सदस्य पोखरामा भेटिए

एकाएक गाउँबाट १६ जनाको पूरै परिवार गायब