पोखरा प्रिमियर लिग (पीपीएल) आउँदो कात्तिक ९ गतेदेखि २० गतेसम्म हुँदैछ। पोखरा मैदानको काम अन्तिम चरणमा पुगेको छ । मैदानको पिच र प्याराफिटको काम अन्तिम चरणमा पुगेको हो ।

बर्खा सकिएसँगै हिमाल खुलेका छन्, मैदानबाट हिमालहरु प्रष्टै देखिने भएकाले मैदान निकै सुन्दर देखिएको छ । कप्तान पारस खड्काले सुन्दर पोखरा रंगशालाको फोटो पोष्ट गरेका छन् ।

अन्तर्राष्ट्रिय खेलाडी पनि आउने भएकाले हिमाल हेर्दै क्रिकेट खेल्न र हेर्न पाइने हुँदा पोखराको बारेमा ठूलो प्रचारप्रसार हुनेछ । विश्वमा यस्ता सुन्दर मैदान कम मात्रै भएकाले पोखरालाई क्रिकेट पर्यटनको रुपमा विकास गर्न सकिनेछ ।

पीपीएललाई आईसीसीको मान्यता

पोखरा प्रिमियर लिग (पीपीएल) लाई अन्तर्राष्ट्रिय क्रिकेट परिषद् (आईसीसी) ले मान्यता दिएको छ ।

क्विन्स इभेन्ट्सका प्रबन्ध निर्देशक छुम्बी लामाले प्रेस विज्ञप्ती मार्फत आईसीसीले पीपीएललाई मान्यता दिएको जनाए। उनले आईसीसीले तोकेको मापदण्डअनुसार सबै कागजपत्र बुझाउनुका साथै प्रतिबद्धता जनाएपछि आईसीसीको स्विकृती आएको बताए। आईसीसीको स्विकृतीकालागि विश्व क्रिकेटको सर्वोच्च संस्थाले तोकेको २० हजार डलर पनि बुझाएको उनले जनाएका छन्।

आईसीसीको स्विकृतीअनुसार नेपाली राष्ट्रिय खेलाडी र अन्तर्राष्ट्रिय खेलाडीले पीपीएलमा सहभागिता जनाउन पाउने छन्। विदेशी खेलाडीको हकमा ती खेलाडीले पीपीएल खेल्न चाहेमा सम्बन्धित देशको स्विकृती पत्र लिएर आउनु पर्नेछ। पीपीएलमा एउटा टोलीमा दुई विदेशी खेलाडी राख्न पाउने नियम रहेको छ।

६ वटा टिमले खेल्ने पीपीएलका लागि खेलाडीको अक्सन भैसकेको छ भने विदेशी खेलाडी किन्ने क्रम चलिरहेको छ ।विराटनगर टाइटन्स, चितवन राइनोज, हुलास काठमाडौं रोयल्स, पोखरा पल्टन, बुटवल ब्लास्टर्स र एक्सपर्ट धनगढी ब्लुजले पीपीएलमा प्रतिस्पर्धा गर्नेछन्।