पोखरा । गण्डकीका मुख्यमन्त्री बस्ने सरकारी निवासमा फेरि आगजनी भएको छ । गएराति करिब साढे २ बजेको समयमा अपरिचित व्यक्तिहरूको समूहले पहिल्यै आगजनीमा परेको निवासमा आगो लगाएका हुन् ।

उक्त भवनमा  भदौ २४ गते जेनजी प्रदर्शनका क्रममा  पनि तोडफोड र आगजनी भएको थियो । मुख्यमन्त्री सुरेन्द्रराज पाण्डे भदौ २४ गते जेनजी प्रदर्शनका समयमा भने देशबाहिर थिए ।

२०७४ मा पहिलोपटक भएको प्रदेशसभा निर्वाचनपछि निर्वाचित मुख्यमन्त्रीका लागि भनेर प्रयोगमा ल्याइएको निवास प्रमुख जिल्ला अधिकारीका लागि भनेर बनाइएको थियो । प्रदेश सरकार बनेपछि उक्त भवनलाई नै मुख्यमन्त्री निवास बनाइएको थियो ।

प्रदेश सरकारले भवन प्रयोग गर्न मिल्ने/नमिल्ने सम्बन्धमा प्राविधिक समिति गठन गरेकोमा यो भवनलाई मर्मतपछि पुनः प्रयोग गर्न मिल्ने भन्ने सुझाव प्राप्त भएको छ । भवनलाई मर्मत गर्ने तयारीमा रहँदा राति आगजनी भएको हो ।

पहिलेको आगजनीमा भवनको एउटा कोठामा भने कम क्षति पुगेको थियो । सोही कोठामा जल्न बाँकी भएका सामानहरू राखिएको थियो ।

मुख्यमन्त्री पाण्डेले आगजनीका कारण बाँकी भएका कागजात जलेर नष्ट भएको बताएका छन् । आगजनीपछि उनी प्रमुख सचिवको निवासमा बस्दै आएका छन् ।