पोखरा जेसीजको ४६ औं शाखा अधिवेशन तथा ५१ औं वार्षिक साधारणसभा शनिबार सम्पन्न भएको छ। उक्त अधिवेशनले वर्ष २०२६ का लागी नयाँ नेतृत्व चयन गरेको छ । जसअन्तर्गत अध्यक्षमा सुमन पहारी निर्वाचित भएका छन्।

उनले अध्यक्ष पदका अर्का उम्मेदवार अनन्त प्रधानाङ्गलाई २६ मतान्तरले पराजित गर्न सफल भएका हुन् । ७८ मतदातासूची रहेको उक्त निर्वाचनमा जम्मा ७४ मत मात्र खसेको थियो ।

पहारीले ५० मत प्राप्त गरे ।  प्रधानाङ्गलाई जम्मा २४ मत मात्र प्राप्त भएको थियो। अध्यक्ष पदका अर्का प्रत्यासी श्रीकृष्ण सुनार मतदानमा सहभागी नहुँदै बाहिरिएपछि मुख्य प्रतिस्पर्धा पहारी र प्रधानाङ्गबीचमै सीमित भएको थियो।

यस्तै, नयाँ कार्यकारिणी उपाध्यक्षमा रबिन्द्र गोदार र उपाध्यक्षहरुमा सरोज पौडेल, सुजल गोदार, सन्दीप श्रीस र मुकेश अर्याल चयन भएका छन् । महासचिवमा सन्जय पौडेल, कोषाध्यक्ष  राजकुमार बोहोरा, सचिव मिना कुमारी थापा र कानुनी सल्लाहकार श्रीकृष्ण सुनार चुनिए ।

त्यस्तै, निर्देशक पदमा बिनय सुवेदी, डम्बर खडायत, सन्तोष सुनार, बिबेक सापकोटा लगायत चुनिएका छन्।

अधिवेशन सफलतापूर्वक सम्पन्न भएको पोखरा जेसीजका पूर्व अध्यक्ष तथा निर्वाचन आयुक्त गणेश गिरीले जानकारी गराए । नयाँ नेतृत्वले २०२६ का लागि संस्थालाई थप सक्रिय, प्रभावकारी र समुदायमुखी बनाउने पहारीले प्रतिबद्धता व्यक्त समेत गरेका छन् ।