स्याङ्जाको पुतलीबजार नगरपालिका –५ पौवैगौंडेस्थित सितला माध्यमिक विद्यालयका विद्यार्थीलाई न्यानो कपडा वितरण गरिएको छ । मुक्तिनाथ विकास बैंकले सामाजिक उत्तरदायित्वअन्तर्गत विद्यालयमा अध्ययनरत १४५ विद्यार्थीलाई न्यानो कपडा वितरण गरेको हो ।

बैंकले एक लाख ५० हजार रुपैयाँ बराबरको न्यानो कपडा हस्तान्तरण गर्दै विद्यार्थीको स्वास्थ्य र पढाइमैत्री वातावरणलाई सहयोग पुगोस भन्ने उद्देश्य राखेको बैंकका सञ्चालक भरतप्रसाद लम्सालले बताए ।

लम्सालका अनुसार “बैंक बढ्न समाजको भूमिकासँगै समाज माथि उठ्न बैंकको सहकार्य जरुरी हुन्छ,” भन्दै बैंकले नाफाभन्दा बाहिर निस्केर समाजका जेहेन्दार र मेहनती वर्गलाई साथ दिँदै आएको उल्लेख गरे ।

मुक्तिनाथ विकास बैंक उप–क्षेत्रीय कार्यालयका प्रमुख ऋषि ढकालले सेवा विस्तारसँगै सामाजिक उत्तरदायित्वमा पनि बैंक उत्तिकै केन्द्रित रहेको बताए । “समाजका हरेक समूहसँग हातेमालो गर्दै अघि बढ्नु नै हाम्रो प्राथमिकता हो,” उनले भने ।

२०६३ सालमा स्याङ्जाबाट कारोबार सुरु गरेको बैंक अहिले नौ अर्बभन्दा बढी चुक्तापुँजीसहित वाणिज्य बैंकतर्फ उक्लने तयारीमा छ । छोटो समयमै राष्ट्रिय स्तरमा विश्वसनीयता बनाएको बैंकले स्थानीय क्षेत्रमा निरन्तर सामाजिक कार्यक्रम सञ्चालन गर्दै आएको छ ।

यस्तै, विद्यालयका पूर्वविद्यार्थी मञ्चको पहलमा १० हजार रुपैयाँ बराबरका खेलकुद सामग्री पनि विद्यालयमार्फत विद्यार्थीलाई हस्तान्तरण गरिएको विद्यालयले जनाएको छ ।